ქარელში დედა-შვილი ცეცხლსასროლი იარაღიდან გასროლით მოკლეს

ქარელის რაიონის სოფელ ტახტისძირში დედა-შვილის მკვლელობა მოხდა.
„კვირას“ ინფორმაციით, სავარაუდოდ, დედა-შვილი ორი დღის წინ ავტომატური ცეცხლსასროლი იარაღიდან გასროლით მოკლეს.
მეზობლებმა გარდაცვლილი დედა-შვილი – 62 წლის მ.ჯ. და 31 წლის მ.ჯ. სახლში დღეს გარდაცვლილი ნახეს.
როგორც „კვირას“ ქარელის მუნიციპალიტეტში სოფელ ტახტისძირის წარმომადგენელმა ნოდარ კოპაძემ განუცხადა, მ.ჯ-მ სამი შვილი ობლობაში გაზარდა, მისი მეუღლე 90-იან წლებში საომარი მოქმედების დროს დაიკარგა და დღემდე უგზო-უკვლოდ დაკარგულად ითვლება.
მისი თქმით, მკვლელობის დღეს სახლში დედა-შვილი მარტო იყვნენ.
„როგორც მეზობლები ამბობენ, გუშინწინ საღამოს 10 საათისთვის სროლი ხმა კი გაიგეს, მაგრამ სასაზღვრო ზოლთან სროლები ხშირად გვესმის და ყურადღება არავინ მიაქცია. დედა-შვილი ორი დღეა სოფელში არავის უნახავს და დღეს მეზობელმა მოიკითხა. სახლში რომ შევიდნენ ორივე მოკლულები იყვნენ. დედა-შვილი არსად მუშაობდნენ და ფინანსურად უჭირდათ კიდეც. მთელი სოფელი გაოგნებულები ვართ, არ ვიცით ვის შეეძლო ეს საშინელება ჩაედინა“, – აცხადებს „კვირასთან“ საუბრისას ნოდარ კოპაძე.
ამ დროისთვის, შემთხვევის ადგილზე კომპლექსური ექსპერტიზა მიმდინარეობს.
როგორც „კვირას“ შს სამინისტროში განუცხადეს, მომხდარ ფაქტთან დაკავშირებით, გამოძიება სსკ-ის 109 მუხლის მე-3 ნაწილით მიმდინარეობს.