“მმართველი გუნდი ნარკოპოლიტიკის ლიბერალიზაციის გზით მიდის”

”მმართველი გუნდი ნარკოპოლიტიკის ლიბერალიზაციის გზით მიდის”, – ამის შესახებ პარლამენტის ჯანდაცვის კომიტეტის თავმჯდომარემ, აკაკი ზოიძემ განაცხადა.
მისივე თქმით, პარლამენტი მიმდინარე კვირის პლენარულ სხდომაზე განიხილავს მთავრობის საკანონმდებლო პაკეტს, რომელიც მარიხუანასა და მცენარე კანაფთან დაკავშირებით, კანონმდებლობის ლიბერალიზაციას ითვალისწინებს.
ზოიძის განმარტებით, პროექტში ყურადღება გამახვილდება პრევენციაზეც.
”მმართველი გუნდი ნარკოპოლიტიკის ლიბერალიზაციის გზით მიდის. შეიძლება, ტემპი ამ მიმართულებით მოგვეწონოს ან არ მოგვეწონოს, მაგრამ დამერწმუნეთ, რომ საზოგადოებაში არსებობს აზრთა სხვადასხვაობა, ამიტომ ვცდილობთ, რომ მაქსიმალურად კონსენსუსის გზით ვიაროთ. კომპლექსურად იქნება ასახული ერთი მხრივ, ნარკოტიკების მომხმარებელთა მიმართ ზრუნვისა და მკურნალობის პოლიტიკა, ხოლო მეორე მხრივ, ნარკოტიკული საშუალებების უკანონო რეალიზაციასთან დაკავშირებით პოლიტიკის გამკაცრება და უკომპრომისო ბრძოლა“, – აღნიშნა აკაკი ზოიძემ.