რუსთაველის თეატრის მსახიობი, კინოპროდიუსერი და პროექტ “შინდისიs” ავტორი ედმონდ მინაშვილი კანის რიგით 70-ე ფესტივალიდან საქართველოში სულ ცოტა ხნის წინ დაბრუნდა. მსახიობი „მარშალპრესს“ შთაბეჭდილებებს უზიარებს. მინაშვილი მსოფლიოში ცნობილ არაერთ კინოვარსკვლავს შეხვდა. ედმონდ მინაშვილი ამბობს, რომ საქართველოში მონიკა ბელუჩის ჩამოყვანა 19 სექტებრისთვის იგეგმება.
„ეს არის ზღაპარი. როდესაც საქართველოში დავბრუნდი, დილით გაღვიძებული ვფიქრობდი, ნამდვილად ვიყავი იქ, თუ სიზმარი იყო, იმდენად მოხიბლული ვარ ამ ფესტივალით. ფესტივალია ფესტივალებთა შორის, მაგრამ ნანახმა ყოველგვარ მოლოდინს გადააჭარბა. ასევე ვფიქრობდი, ჩემს გვერდით იყვნენ ის ადამიანები, ვისაც ხელეწიფება, ვისაც ვალდებულება აქვს აღებული ამ მიმართულებით, ხედავდნენ ეს რამხელა ინდუსტრიაა და რაოდენ დიდი სარგებელი შეუძლია მოუტანოს ქვეყანას ფესტივალმა, როგორც ეკონომიკის, ასევე პოპულარიზაციის მიმართულებით. ეს არის ძალიან კარგი მენეჯმენტით აწყობილი, ძალიან კარგად შეფუთული ბიზნესი, მე ეს დავინახე.