შპს „არქიტექტორები და კომპანიის“ დირექტორი თამაზ იაქაშვილი არ გამორიცხავს, რომ ბაგრატის ტაძარში წყლის ჩასვლა სწორედ 2012 წელს ჩატარებულ სამუშაოებს უკავშირდებოდეს.
როგორც საზოგადოებრივს იაქაშვილმა განუცხადა, წყალი სარკმლებიდან ჟონავს, რისი მიზეზიც 2012 წელს სარეაბილიტაციო პროცესის დროს დაშვებული სამშენებლო ხარვეზებია.
“ბაგრატში მოხდა ასეთი რამ – 2011 წლის ნოემბერი იყო, როცა დაგვიბარეს და გვითხრეს, რომ უნდა მოვრჩენილიყავით სამუშაოებს 2012 წლის 1 სექტემბრისთვის. არც თაღები იყო და არც ტრომპი არ იყო გადაყვანილი. შეთანხმებულიც არ იყო გუმბათის ყელის ბოლო ვარიანტი. მაშინ სხვა გზა არ გვქონდა და დავეთანხმეთ ამ მოთხოვნას. დროის უქონლობის გამო, ფორს-მაჟორში ვმუშაობდით და გამორიცხული არ არის, რომ რაღაც დააკლდა. აუცილებელია, შესწორება. წვიმის დროს შესაძლებელია, კიდევ ჩაჟონოს წყალმა, როგორც აქამდე“ – განაცხადა თამაზ იაქაშვილმა.
კომპანია, ბაგრატის სამონასტრო კომპლექის რეაბილიტაცია-რესტავრაციაზე 2009-2012 წლებში მუშაობდა. კულტურული მემკვიდრეობის სააგენტოს საზოგადოებასთან ურთიერთობის სამსახურის ხელმძღვანელმა ბექა ბარამიძემ საზოგადოებრივთან საუბარში აღნიშნა, დაზიანებები აღინიშნება როგორც გუმბათის ყელის შიდა მხარეს, ისე ახალი მინაშენის კედლებზე.
მისივე თქმით, გამოვლენილია ნალექისგან გამოწვეული სერიოზული და მნიშვნელოვანი ლაქები, რომელთაც სათანადო წესით გაწმენდა სჭირდებათ. გუმბათის ყელის სარკლმებსა და გადახურვის ცალკეულ სეგმენტებს, საიდანაც ჟონავს წყალი, სჭირდება სათანადო წესით დამუშავება და აღდგენა. სპეციალისტების თქმით, ბაგრატის სამონასტრო კომპლექსის მთავარ ტაძარზე ხარვეზები სწორედ სარეაბილიტაციო სამუშაოების ნაჩქარევად განხორციელებას უკავშირდება, რომლის დროსაც ტაძრის გუმბათზე გამოუმშრალი ხის მასალის სარკმლები დამონტაჟდა.
შპს „არქიტექტორები და კომპანიამ“ არსებული ნაკლოვანებები დაჩქარებულ ვადებში უნდა გამოასწოროს. აღნიშნულ ვალდებულებას, სამშენებლო ჯგუფს საკათედრო ტაძრის რეაბილიტაციის პროცესის დაწყებამდე გაფორმებული ხელშეკრულება აკისრებს.
კულტურული მემკვიდრეობის დაცვის ეროვნული სააგენტოს ინფორმაციით, 16 ივნისს შპს „არქიტექტორები და კომპანიის“ წარმომადგენლებთან ერთად სამუშაო შეხვედრა გაიმართება, რომლის დროსაც კონკრეტულად განისაზღვრება ხარვეზების გამსოწორების მეთოდოლოგია.
საქართველოს კულტურული მემკვიდრეობის ეროვნული სააგენტოს ინფორმაციით, ბაგრატის სამონასტრო კომპლექსის მთავარი ტაძრის დარბაზში წყალი ჟონავს, რისი მიზეზიც 2012 წელს სარეაბილიტაციო პროცესის დროს დაშვებული სამშენებლო ხარვეზებია.