“ეროვნული ფორუმი”-ს ერთ-ერთი ლიდერი ანი მიროტაძე აცხადებს, რომ ტელეკომპანია “რუსთავი 2”-სათვის პოლიტიკური ბრძოლა მიმდინარეობს და ეს პროცესი აღნიშნულ ტელეკომპანიას დააზარალებს.
„ვხედავ სააკაშვილის კვალსაც და „ევროპული საქართველოს“ კვალსაც. დღეს მიმდინარეობს ბრძოლა გავლენების გადასანაწილებლად, ანუ ვინ მართავს „რუსთავი 2“-ს პოლიტიკურად, სააკაშვილის გუნდი თუ პირობითად ბოკერიას გუნდი. არ ვიცი საბოლოოდ რა გადაწყვეტილებას მიიღებს ნიკა გვარამია, დარჩება გენდირექტორად თუ არა, მაგრამ თუ ის დარჩა, ეს ნიშნავს, რომ მან განაცხადა თანხმობა ყველა იმ პირობაზე, რომელიც მას სააკაშვილმა შესთავაზა. გარედან რაც ჩანს, იგრძნობა რომ სააკაშვილის გავლენა უფრო მეტია „რუსთავი 2“-ზე, ვიდრე „ევროპული საქართველოს“ წარმომადგენლების. რამდენად დააზარალებს ეს პროცესი, როგორც პოლიტიკური, ისე ფინანსური „რუსთავი 2“-ის სარედაქციო ხარისხს, ამას ვნახავთ დაახლოებით თვენახევრის განმავლობაში. მათ შორის საინფორმაციო სამსახურის შენარჩუნება პრინციპულად მნიშვნელოვანი საკითხი იქნება“ – აცხადებს მიროტაძე.