თეთრი სახლი ბოლო სამი დღის განმავლობაში მიმდინარე პროტესტის მონაწილეებს მოძალადე აგიტატორებს უწოდებს და სამართალდამცველების შეურაცხყოფაში ადანაშაულებს.
აშშ-ის პრეზიდენტის ადმინისტრაციის პრესმდივანი კეროლაინ ლევიტი აცხადებს, რომ სასაზღვრო და საიმიგრაციო აღსრულების ოფიცრები არალეგალი დამნაშავეების დაკავებისა და დეპორტაციის მიზნით ატარებენ რეიდებს, და თეთრი სახლისთვის გაუგებარია, თუ რატომ აპროტესტებენ ამერიკის ქალაქებში გამოსული ადამიანები დამნაშავეთა დაკავებას.
ლევიტმა ასევე აღნიშნა, რომ აგიტატორების მხრიდან ფედერალური ოფიცრების მიმართ ძალადობის ფაქტების ფონზე, თეთრი სახლი სამართალდამცველებს სრულ მხარდაჭერას უცხადებს.
„პრეზიდენტი ტრამპი და მთელი ადმინისტრაცია სასაზღვრო და საიმიგრაციო აღსრულების ოფიცრების გვერდით დგას. ისინი კანონიერ ოპერაციებს ატარებენ და სწორედ ეს ხდება ახლა მინესოტასა და მთელ ქვეყანაში. ხედავთ აგიტატორებს, რომლებიც ძალადობრივ პროტესტში იღებენ მონაწილეობას და ფედერალურ აგენტებს შეურაცხყოფას აყენებენ. რას აპროტესტებენ? ისინი აქტიურად ცდილობენ, რომ ხელი შეუშალონ სამართალდამცველთა ოპერაციებს და არალეგალი კრიმინალების დეპორტაციას. აქ საუბარია ყველაზე საშინელ არალეგალ მიგრანტ კრიმინალებზე, პედოფილებზე, სექსუალურ მოძალადეებსა და მკვლელებზე“, – თქვა ლევიტმა Fox News-ის ეთერში.