შეერთებული შტატების მიერ გრენლანდიის საკითხის გამო ახალი ტარიფების დაწესების ამოქმედების შემთხვევაში საფრანგეთის პრეზიდენტი ემანუელ მაკრონი ევროკავშირს ეკონომიკური იძულების საწინააღმდეგო ინსტრუმენტის (ACI) – ე.წ. ბაზუკის გააქტიურებისკენ მოუწოდებს. ცნობას Euractiv-ი ელისეს სასახლის პრესმდივანზე დაყრდნობით ავრცელებს და აღნიშნავს, რომ შესაბამისი ინიციატივით ევროკომისიის პრეზიდენტ ურსულა ფონ დერ ლაიენს წერილობით გერმანელმა ევროპარლამენტარმა ვალერი ჰაიერმაც მიმართა.
ე.წ. ბაზუკა, რომელიც ეკონომიკური ზომების საკმაოდ ფართო სპექტრს მოიცავს, ევროკავშირმა 2023 წელს დაამტკიცა, მაგრამ არასდროს გამოუყენებია. ეს ბრიუსელის ყველაზე ძლიერი სავაჭრო იარაღია, რომელიც ევროკომისიას საშუალებას აძლევს ფართ ზომების სახით სანქციები არა მხოლოდ საქონელზე, არამედ მომსახურებაზეც დააწესოს.
მას შემდეგ, რაც აშშ-ის პრეზიდენტმა დონალდ ტრამპმა რამდენჯერმე გამოთქვა აშშ-ის პრეტენზიები გრენლანდიაზე, 8 ევროპულმა ქვეყანამ სადაზვერვო მისიის ფარგლებში კუნძულზე საკუთარი სამხედროები გაგზავნა. 17 იანვარს ტრამპმა გამოაცხადა, რომ ამ ქვეყნებს 10%-იან ტარიფებს დაუწესებს და დასძინა, რომ ტარიფები ძალაში 1 თებერვლიდან შევა, ხოლო ივნისიდან 25%-მდე გაიზრდება, თუ არ იქნება მიღწეული შეთანხმება ამერიკის შეერთებული შტატების მიერ გრენლანდიის ყიდვის შესახებ.