საქართველოს დემოგრაფთა ასოციაცია და „დემოგრაფიული აღორძინების ფონდი“ კონსტიტუციაში დემოგრაფიული მიმართულების შეტანასთან დაკავშირებით ერთობლივ განცხადებას ავრცელებენ.
განცხადებას „დემოგრაფიული აღორძინების ფონდის“ ხელმძღვანელი თამარ ჩიბურდანიძე და „დემოგრაფთა ასოციაციის“ პრეზიდენტი ვაჟა ლორთქიფანიძე აწერენ ხელს.
„საქართველოს კონსტიტუციაში შედის დემოგრაფიული მიმართულება, რითაც სახელმწიფო პასუხისმგებლობას იღებს ქვეყნის დემოგრაფიული მდგომარეობის გაუმჯობესებაზე. ეს უპრეცედენტო ფაქტია ჩვენი ქვეყნის ისტორიაში. როდესაც ხელისუფლებას უმაღლეს რანგში ჰყავს დღესდღეობით ქვეყნის ერთ-ერთი ყველაზე დიდი პრობლემა, ჩნდება იმედი, რომ ეს პრობლემა აუცილებლად მოგვარდება. ქართველი მეცნიერები, დემოგრაფები წლების მანძილზე იბრძოდნენ ამისთვის. ბოლო 4 წლის მანძილზე ხელისუფლებასთან ჩვენი თანამშრომლობით გარკვეული შედეგი მივიღეთ, თუმცა პრობლემა იმდენად დიდია, რომ კიდევ უფრო მეტ შრომას მოითხოვს. კონსტიტუციაში დემოგრაფიული მიმართულების შეტანით ვიმედოვნებთ, ამ თემაზე მუშაობა გააქტიურდება არა მხოლოდ ხელისუფლების, არამედ, საზოგადოებრივი ორგანიზაციების მხრიდანაც.
გვსურს მადლობა გადავუხადოთ საქართველოს პარლამენტს და მის თავმჯდომარეს, ბატონ ირაკლი კობახიძეს. განსაკუთრებულ მადლობას ვუხდით ამ ინიციატორის ავტორს, ბატონ დიმიტრი ხუნდაძეს, რომელიც 4 წელია სათავეში უდგას დემოგრაფიული ინიციატივების შემუშავებას და წარმატებულად ახორციელებს ყველა მიმართულებას. ასეთი ერთსულოვნება არის იმის გარანტი, რომ საქართველო აუცილებლად გამოვა მძიმე დემოგრაფიული მდგომარეობიდან“, – ნათქვამია ერთობლივ განცხადებაში.