მეორე მსოფლიო ომი ჯერ კიდევ ცოცხლობდა ამერიკელებისა და ევროპელების მეხსიერებაში, ამ ფონზე კი ჩვენ აღმოვჩნდით ახალი გლობალური კატასტროფის წინაშე, რომელსაც განადგურების უფრო აპოკალიფსური პოტენციალი ჰქონდა, – ამის შესახებ ამერიკის სახელმწიფო მდივანმა, მარკო რუბიომ მიუნხენის უსაფრთხოების კონფერენციაზე სიტყვით გამოსვლისას განაცხადა.
მისივე თქმით, 1963 წლისთვის, როდესაც მიუნხენის უსაფრთხოების კონფერენცია პირველად გაიმართა, ევროპასა და ამერიკას საერთო მიზანი ჰქონდა და საბოლოოდ მათ ერთად გაიმარჯვეს.
„დღეს აქ შევიკრიბეთ, როგორც ისტორიული ალიანსის წევრები, ალიანსის, რომელმაც გადაარჩინა და შეცვალა მსოფლიო. იცით, როდესაც ეს კონფერენცია 1963 წელს დაიწყო, ის დაიწყო კონტინენტზე, რომელიც საკუთარი თავის წინააღმდეგ იყო გაყოფილი. კომუნიზმსა და თავისუფლებას შორის ზღვარი გერმანიის გულზე გადიოდა. ამ პირველ კონფერენციამდე რამდენიმე თვით ადრე, ვიდრე ჩვენი წინამორბედები პირველად შეხვდებოდნენ აქ, მიუნხენში, კუბის კრიზისმა მსოფლიო ბირთვული განადგურების პირას მიიყვანა. მიუხედავად იმისა, რომ მეორე მსოფლიო ომი ჯერ კიდევ ცოცხლობდა ამერიკელებისა და ევროპელების მეხსიერებაში, ჩვენ აღმოვჩნდით ახალი გლობალური კატასტროფის წინაშე, ისეთის, რომელსაც ახალი სახის განადგურების პოტენციალი ჰქონდა, უფრო აპოკალიფსური და საბოლოო, ვიდრე კაცობრიობის ისტორიაში ოდესმე მომხდარა.
ჩვენ საერთო მიზანი გვქონდა. ჩვენ გაერთიანებულები ვიყავით არა მხოლოდ იმით, რის წინააღმდეგაც ვებრძოდით, არამედ იმითაც, რისთვისაც ვიბრძოდით. ევროპამ და ამერიკამ ერთად გაიმარჯვეს, კონტინენტი აღდგა, ჩვენი ხალხი აყვავდა. დროთა განმავლობაში, აღმოსავლეთისა და დასავლეთის ბლოკები გაერთიანდა. ცივილიზაცია კვლავ გაერთიანდა. ის სამარცხვინო კედელი, რომელმაც ეს ერი ორად გაყო, დაინგრა და მასთან ერთად – ბოროტების იმპერიაც“, – განაცხადა რუბიომ.
როგორც რუბიომ აღნიშნა, აღმოსავლეთისა და დასავლეთის ბლოკების გაერთიანების ეიფორიამ სახიფათო ილუზია შექმნა, რომელიც აშშ-სა და ევროპას ძვირად დაუჯდა.
„აღმოსავლეთი და დასავლეთი კვლავ ერთიანი გახდნენ, მაგრამ ამ ტრიუმფის ეიფორიამ სახიფათო ილუზიამდე მიგვიყვანა. გვეგონა, რომ ისტორიის დასასრულს მივაღწიეთ, ყველა ერი ახლა ლიბერალური დემოკრატია იქნებოდა, ვაჭრობითა და მხოლოდ კომერციით ჩამოყალიბებული კავშირები ახლა ეროვნულობას ჩაანაცვლებდა. გვეგონა, რომ წესებზე დაფუძნებული გლობალური წესრიგი ახლა ეროვნულ ინტერესებს ჩაანაცვლებდა და საზღვრების გარეშე სამყაროში ვიცხოვრებდით, სადაც ყველა მსოფლიოს მოქალაქე გახდებოდა. ეს იყო სულელური იდეა, რომელიც უგულებელყოფდა როგორც ადამიანურ ბუნებას, ასევე უგულებელყოფდა 5 000 წელზე მეტი ხნის ჩაწერილი კაცობრიობის ისტორიის გაკვეთილებს, ეს ძვირად დაგვიჯდა. ამ ილუზიაში ჩვენ თავისუფალი და შეუზღუდავი ვაჭრობის დოგმატური ხედვა მივიღეთ.
ჩვენ სულ უფრო ხშირად ვაძლევდით ჩვენს სუვერენიტეტს საერთაშორისო ინსტიტუტებს, მაშინ როდესაც ბევრი ერი ინვესტიციებს ახორციელებდა მასიურ სოციალურ სახელმწიფოებში თავდაცვის უნარის შენარჩუნების ფასად. ეს მაშინ, როდესაც სხვა ქვეყნებმა ინვესტიცია ჩადეს კაცობრიობის ისტორიაში ყველაზე სწრაფ სამხედრო გაძლიერებაში და არ ყოყმანობდნენ მკაცრი ძალის გამოყენებისას საკუთარი ინტერესების განსახორციელებლად. კლიმატის კულტის დასამშვიდებლად ჩვენ საკუთარ თავს დავაკისრეთ ენერგეტიკული პოლიტიკა, რომელიც აღარიბებს ჩვენს ხალხს, მაშინაც კი, როდესაც ჩვენი კონკურენტები იყენებენ ნავთობს, ქვანახშირს, ბუნებრივ გაზს და ყველაფერს არა მხოლოდ საკუთარი ეკონომიკის გასაძლიერებლად, არამედ ჩვენივე ეკონომიკის წინააღმდეგ ბერკეტად გამოსაყენებლად“, – განაცხადა რუბიომ.