არ გვინდა, რომ ჩვენი მოკავშირეები დანაშაულის გრძნობითა და სირცხვილით იყვნენ შებოჭილი. გვინდა მოკავშირეები, რომლებიც ამაყობენ თავიანთი კულტურითა და მემკვიდრეობით, – ამის შესახებ ამერიკის სახელმწიფო მდივანმა, მარკო რუბიომ მიუნხენის უსაფრთხოების კონფერენციაზე სიტყვით გამოსვლისას განაცხადა.
რუბიოს თქმით, აშშ ევროპას კვლავ მოკავშირედ განიხილავს და მას სჭირდება ისეთი მოკავშირეები, რომლებსაც თავიანთი თავის დაცვა შეუძლიათ.
„არ გვინდა, ჩვენი მოკავშირეები სუსტები იყვნენ, რადგან ეს ჩვენც გვასუსტებს. გვინდა მოკავშირეები, რომლებსაც შეუძლიათ თავიანთი თავის დაცვა, რათა არცერთ მოწინააღმდეგეს არ შეექმნას ცდუნება, ჩვენი კოლექტიური ძალა გამოცადოს. სწორედ ამიტომ არ გვინდა, რომ ჩვენი მოკავშირეები დანაშაულის გრძნობითა და სირცხვილით იყვნენ შებოჭილი. გვინდა მოკავშირეები, რომლებიც ამაყობენ თავიანთი კულტურითა და მემკვიდრეობით, რომლებსაც ესმით, რომ ჩვენ ვართ ერთისა და იმავე დიდი და კეთილშობილი ცივილიზაციის მემკვიდრეები და ჩვენთან ერთად ყველა მზადაა და შეუძლია ამის დაცვა.
ერთად შეგვიძლია ჩვენი ეკონომიკის რეინდუსტრიალიზაცია და ჩვენი ხალხის დაცვის შესაძლებლობების აღდგენა. თუმცა ამ ახალი ალიანსის მუშაობა არ უნდა იყოს ორიენტირებული მხოლოდ სამხედრო თანამშრომლობასა და წარსულის ინდუსტრიების დაბრუნებაზე. ის ასევე ორიენტირებული უნდა იყოს ჩვენი საერთო ინტერესებისა და ახალი საზღვრების ერთობლივ წინსვლაზე, ჩვენი გამომგონებლობის, დინამიკური სულისკვეთების განთავისუფლებაზე ახალი დასავლური საუკუნის ასაშენებლად.
ჩვენ არ ვცდილობთ დაშორებას, არამედ ვცდილობთ ძველი მეგობრობის აღორძინებას და კაცობრიობის ისტორიაში უდიდესი ცივილიზაციის განახლებას. გვინდა განახლებული ალიანსი, რომელიც აღიარებს, რომ ჩვენი საზოგადოებების პრობლემები არა მხოლოდ ცუდი პოლიტიკის ერთობლიობა, არამედ უიმედობისა და თვითკმაყოფილების სისუსტის შედეგია. კლიმატის ცვლილების შიში, ომის შიში, ტექნოლოგიების შიში. ამის ნაცვლად, ჩვენ გვინდოდა ალიანსი, რომელიც თამამად მიისწრაფვის მომავლისკენ. ერთადერთი შიში, რაც გვაქვს, არის სირცხვილის შიში, რომ ჩვენი ერები არ დავტოვოთ მეტად ამაყები, ძლიერები და მდიდრები ჩვენი შვილებისთვის. ალიანსი, რომელიც მზადაა, დაიცვას ჩვენი ხალხი, დაიცვას ჩვენი ინტერესები და შეინარჩუნოს მოქმედების თავისუფლება, რომელიც საშუალებას გვაძლევს, თავად ჩამოვაყალიბოთ ჩვენი ბედი“, – განაცხადა აშშ-ის სახელმწიფო მდივანმა.