ევროკომისიამ უნგრეთისთვის თავდაცვითი პროგრამა Security Action for Europe (SAFE)-ის ფარგლებში 16 მილიარდი ევროს კრედიტის დამტკიცება გადადო. ინფორმაციას პოლონური მედია ავრცელებს. მათი ცნობით, ამ გადაწყვეტილების მიზეზად ქვეყნის პრემიერ-მინისტრის, ვიქტორ ორბანის მიერ უკრაინის დახმარებაზე დადებული ვეტო დასახელდა.
ოფიციალურად, ევროკომისია აცხადებს, რომ უნგრეთის განაცხადის განხილვას აგრძელებს და გეგმას მაშინ დაამტკიცებს, როდესაც ის მზად იქნება. თუმცა, წყაროები ჟურნალისტებს უყვებიან, რომ ევროკომისიას არ სურს სესხის გაცემა, რადგან ორბანი „ლოიალური თანამშრომლობის პრინციპს არღვევს“ და უკრაინის დაფინანსებას ბლოკავს.
ვიქტორ ორბანმა ვეტო უკრაინისთვის 90 მილიარდი ევროს სესხის გამოყოფას კიდევ ერთხელ 19 მარტს დაადო და განაცხადა, რომ დახმარების ბლოკირებას იმ დრომდე გააგრძელებს, ვიდრე კიევი უნგრეთში რუსული ნავთობის ტრანზიტს არ აღადგენს.