აშშ-ის პრეზიდენტმა, დონალდ ტრამპმა მიანიშნა, რომ აშშ შეამცირებს ნატოს სხვა ქვეყნების დაცვაზე გაწეულ ხარჯებს მას შემდეგ, რაც ზოგიერთმა ევროპულმა ქვეყანამ უარი თქვა მის მოთხოვნაზე – დახმარებოდნენ ირანის წინააღმდეგ ომში. ინფორმაციას ამის შესახებ ტელეკომპანია CNN-ი ავრცელებს.
„ვფიქრობ, საშინელი შეცდომა იყო, როდესაც ნატო უბრალოდ არ დაგვიდგა გვერდით“, – განაცხადა ტრამპმა.
„ეს შეერთებულ შტატებს დიდ ფულს დააზოგინებს, რადგან ჩვენ ყოველწლიურად ასობით მილიარდ დოლარს ვხარჯავთ ნატოზე, მათ დასაცავად. ჩვენ ყოველთვის მათ გვერდით ვიყავით, მაგრამ ახლა, მათი ქმედებებიდან გამომდინარე, ვფიქრობ, აღარ ვართ ვალდებულნი ეს ვაკეთოთ, არა?“ – თქვა ტრამპმა.
მან თავისი მოთხოვნები ერთგვარ „ლოიალობის ტესტად“ წარმოაჩინა და აღნიშნა, რომ სამხედრო ხომალდების გაგზავნა „ძალიან მცირე ძალისხმევა“ იქნებოდა იმ ქვეყნებისთვის, რომლებიც საკუთარი უსაფრთხოებისთვის შეერთებულ შტატებზე არიან დამოკიდებულნი.
„რატომ უნდა ვიყოთ მათ გვერდით, თუ ისინი არ არიან ჩვენ გვერდით?“ – განაცხადა ტრამპმა.