სამშაბათს გამთენიისას, დუბაის სანაპიროსთან ახლოს, ირანმა სრულად დატვირთულ ნავთობტანკერზე იერიში მიიტანა. „როიტერის“ ცნობით, თავდასხმის შედეგად ტანკერზე ცეცხლი გაჩნდა.
ამასთან, მედიის ინფორმაციით, თავდასხმის ობიექტი ქუვეითის დროშის ქვეშ მცურავი სავაჭრო გემი „ალ-სალმი“ იყო.
გემის მფლობელმა კომპანიაში Kuwait Petroleum Corp-ში განაცხადეს, რომ თავდასხმამ ხანძარი და ხომალდის კორპუსის დაზიანება გამოიწვია.
არაბთა გაერთიანებული საამიროების ხელისუფლებამ მოგვიანებით განაცხადა, რომ ხანძრის ჩაქრობა დროულად შეძლეს. ნავთობის გაჟონვისა და ეკიპაჟის წევრების დაშავების შესახებ ინფორმაცია არ ვრცელდება.
როგორც „როიტერი“ წერს, ირანმა ტანკერზე იერიში მას შემდეგ მიიტანა, რაც აშშ-ის პრეზიდენტმა, დონალდ ტრამპმა თეირანი გააფრთხილა, რომ ირანი ჰორმუზის სრუტეს თუ არ გახსნის, ის მის ენერგეტიკულ სადგურებსა და ნავთობის ჭაბურღილებს გაანადგურებს.