ის, რომ დღეს ევროპაში აღარც უსაფრთხოებაა და აღარც თანამშრომლობა, სწორედ ამ ბიუროკრატების დამსახურებაა, – განაცხადა კულტურის საპარლამენტო კომიტეტის თავმჯდომარე გიორგი გაბუნიამ გადაცემაში „დღის ქრონიკა“.
მისივე თქმით, ეს ლიდერები, რომლებიც დღეს მართავენ ევროკავშირს, აბსოლუტურად დაცლილია ყოველგვარი პრაგმატიზმისგან, ყოველგვარი რაციონალური პოლიტიკისგან და ის უმძიმესი პოლიტიკური, ეკონომიკური თუ ღირებულებითი კრიზისი, რომელიც დღეს ევროკავშირში არსებობს, არის პირდაპირ ამ ადამიანების დამსახურება.
„როდესაც ჩვენ ვისმენთ კაია კალასის ასეთ განცხადებას, რომ თურმე ის მხარს უჭერს ქართველ ხალხს და თურმე საქართველოს ხელისუფლებას მხარს არ უჭერს, ეს აჩვენებს, რომ ელემენტარული პოლიტიკური უნარები, რაც უნდა გააჩნდეს პოლიტიკოსს, არ გააჩნია ამ ადამიანს, რომელიც თავად არაერთხელ იყო მხილებული კორუფციულ სკანდალებში.
ეს ადამიანი, რომელიც დახუნძლულია კომპრომატებით, პირდაპირ ტყვედ ჰყავთ აყვანილი იმ ოლიგარქიულ მმართველებს და იმ ძალას, რომელსაც ჩვენ „დიფ სთეითს“ ვეძახით, პირდაპირ ტყვედ ჰყავთ აყვანილი და მართავენ ისე, როგორც უნდათ. მხოლოდ კაია კალასზე არ მაქვს საუბარი, აქ იგულისხმება მარტა კოსი და სხვა ის ევროკავშირის პოლიტიკოსები, რომლებიც საქართველოს მიმართ გამოირჩევიან აგრესიული და არასამართლიანი განცხადებებით“, – აღნიშნა გიორგი გაბუნიამ.
კულტურის საპარლამენტო კომიტეტის თავმჯდომარემ ასევე თქვა, რომ განსხვავებული აზრის დაფიქსირება სწორედ იმას მიანიშნებს, რომ თანამშრომლობა არ არსებობს ევრო ბიუროკრატებს შორის. მათ ერთიანი პოზიცია არ გააჩნიათ სტრატეგიულ საკითხებთან მიმართებით.
„ასეთი ტიპის ლიდერების, ასეთი გაუაზრებელი პოლიტიკის მწარმოებელი ლიდერების პირობებში შეუძლებელია, რომ ჩვენს შორის ურთიერთობებთან დაკავშირებით რაიმე პოზიტიური ცვლილება მოხდეს. რაც მეტია იმედი, მეტია იმედგაცრუება, ამიტომ მე იმედს ვერ ვხედავ, რომ ამ არსებული ევროკავშირის ლიდერების პირობების შემთხვევაში მოხდეს ჩვენს შორის ურთიერთობების გაჯანსაღებისთვის საჭირო პირობების შექმნა, თუმცა გრძელვადიან პერსპექტივაში ჩვენ ურთიერთობას აქვს უდიდესი პოტენციალი“, – აღნიშნა გიორგი გაბუნიამ.