ფშაველი-აბანო-ომალოს საავტომობილო გზის ორი მონაკვეთი მეწყერის გამო დაიტბორა

საავტომობილო გზების დეპარტამენტის ინფორმაციით, შიდასახელმწიფოებრივი მნიშვნელობის ფშაველი-აბანო-ომალოს საავტომობილო გზის 56-ე კმ-ზე ბოლო დღეებში მეწყერული მონაკვეთი გააქტიურდა, – ამის შესახებ ნათქვამია საქართველოს საავტომობილო გზების დეპარტამენტის მიერ გავრცელებულ განცხადებაში.
მათივე ინფორმაციით, გზის მიმდებარედ გამოფიტული და ეროზირებული მეწყრული ფერდობიდან, გზის სავალ ნაწილზე სისტემატიურად ჩამოდის მიწა-კლდოვანი ჩამონაშალი, რომლის ნაწილიც ჩადის მდინარის კალაპოტში, არსებულმა მეწყრულმა პროცესებმა გამოიწვია მდინარის ნაწილობრივ შეგუბება და წყლის დონის მატების შედეგად გზის ორი მონაკვეთი დაიტბორა.
ადგილზე იმყოფებიან საავტომობილო გზების დეპარტამენტის შესაბამისი სამსახურები და დაწყებულია დამატებითი მანქანა–მექანიზმების მობილიზება, რათა უმოკლეს ვადებში გზის გაწმენდა მოხდეს.
საავტომობილო გზების დეპარტამენტი მოსახლეობას სთხოვს, აღნიშნულ მონაკვეთზე გადაადგილებისას გამოიჩინოთ ყურადღება და სიფრთხილე და არ გააჩეროთ ავტომანქანები ქვის ცვენის ადგილებში.