პრემიერი – ყველაფერი უნდა გავაკეთოთ, რომ ჩვენი ქვეყანა იყოს ისეთი, როგორზეც ილია ოცნებობდა

ნამდვილად ყველაფერი უნდა გავაკეთოთ მთელ ერთან ერთად, რომ ჩვენი ქვეყანა იყოს ისეთი, როგორზეც ილია ოცნებობდა, – ამის შესახებ საქართველოს პრემიერ-მინისტრმა გიორგი კვირიკაშვილმა მთავრობის დღევანდელ სხდომაზე განაცხადა.
პრემიერმა საზოგადოებას ილია ჭავჭავაძის 180 წლის იუბილე მიულოცა და აღნიშნა, რომ მთავრობის ორგანიზებით, ამ იუბილესთან დაკავშირებით სადღესასწაულო კულტურულ-საგანმანათლებლო ღონისძიებები თბილისში, საგურამოსა და ყვარელში გაიმართება.
„მინდა ყველას მოგილოცოთ უდიდესი ეროვნული მოღვაწის, ქართველთა განმანათლებლის, ილია ჭავჭავაძის 180 წლის იუბილე. ღონისძიებები გაიმართება სათაურით „ილია – ჩვენი თანამედროვე“ და ეს სიტყვები ნამდვილად ასახავს არსს და მასშტაბურობას ამ უდიდესი ეროვნული მოღვაწის, ვინაიდან არ არსებობს თუნდაც დღევანდელი ნებისმიერი ეროვნული პრობლემა, რომელზეც ამონახსნიც ვერ ამოიკითხებოდეს ილიას ნააზრევში. კიდევ ერთხელ მინდა მოგილოცოთ ამ უდიდესი მოღვაწის იუბილე, მოღვაწის, რომელმაც მთელი თავისი ცხოვრება მიუძღვნა ერის თვითმყოფადობის განმტკიცებას, სახელმწიფოებრივი აზროვნების გაღვივებას და ნამდვილად ყველაფერი უნდა გავაკეთოთ მთელ ერთან ერთად, რომ ჩვენი ქვეყანა იყოს ისეთი, როგორზეც ილია ოცნებობდა“, – განაცხადა პრემიერ-მინისტრმა.