“სამშენებლო რეგულაციები გამკაცრდება”

ამის შესახებ კალაძემ დღეს სამშენებლო კომპანიების წარმომადგენლებთან და დეველოპერებთან შეხვედრის შემდეგ განაცხადა.

“მაცხოვრებელთა უსაფრთხოება ჩვენთვის უმნიშვნელოვანესია. დღევანდელ შეხვედრას ესწრებოდნენ სამშენებლო კომპანიების წარმომადგენლები და დეველოპერები, რომლებიც მხარს უჭერენ ჩვენს მოსაზრებებს. კერძოდ იმას, რომ ახალი აშენებული შენობები უნდა იყოს მოპირკეთებული და არამარტო შეღები, რაც ძალიან აზიანებს ქალაქის იერსახეს. ამასთან დაკავშირებით ჩვენ ერთად ვიმუშავებთ და დარწმუნებული ვარ ის რაც ჩვენ ყველას გვაწუხებს, ქალაქის იერსახის პრობლემა, მომდევნო წლებში გამოსწორებული იქნება და ქალაქი დაემსგავსება ქალაქს. ჩვენთვის მოქალაქეების უსაფრთხოება არის პრიორიტეტული, ამიტომ სამშენებლო რეგულაციები გამკაცრდება”, – განაცხადა ახლად არჩეულმა მერმა.

კალაძემ ასევე აღნიშნა, რომ დედაქალაქში, დაუსრულებელი მშენებლობების პრობლემა არის ძალიან მნიშვნელოვანი.

“რამდენიმე კომპანიაა, რომელიც ასეთ შენობა-ნაგებობებს ფლობს. ამ კომპანიებს გარკვეული ფინანსური პრობლემები შეექმნათ, სერიოზული ზიანი მიადგა იმ ადამიანებს ვისაც ავანსი ჰქონდათ გადახდილი და ამ საკითხზე ჩვენ, რა თქმა უნდა, დავიწყებთ მუშაობას და ჩამოვაყალიბებთ გეგმას თუ როგორ უნდა მოხდეს ამ პრობლემის მოგვარება”, – აღნიშნა ახლად არჩეულმა მერმა.

მისივე თქმით, ხრუშოვკების ჩანაცვლების პროექტი არის მის სამოქმედო გეგმაში და ამასთან დაკავშირებით კონკრეტულ ნაბიჯებს დროდადრო გააცნობს საზოგადოებას.