„ბიუჯეტი ფაქტობრივად გასუფთავებულია“, – აცხადებს თიანეთის მერი თამაზ მეჭიაური, რომელიც მერის თანამდებობაზე საქმიანობას გუშინ შეუდგა. როგორც თამაზ მეჭიაურმა აღნიშნა, მას სამუშაო ადგილზე სხვადასხვა პრობლემა დახვდა, მათ შორის კი ყველაზე თვალსაჩინოა, წინასწარ ათვისებული თანხები და მერიის ავტოტრანსპორტის საგანგაშო მდგომარეობა. ინფორმაციას ipn-ი ავრცელებს.
„სოციალური დახმარებებისთვის გათვალისწინებული თანხები მთლიანად ათვისებულია. ასევე პრაქტიკულად, დახარჯულია კულტურული ღონისძიებებისთვის, მათ შორის, საახალწლო ღონისძიებებისთვის საჭირო თანხები. ასევე, მთლიანად ათვისებულია წარმომადგენლობითი ხარჯები. ავტოტრანსპორტი კატასტროფულ მდგომარეობაშია და საექსპლუატაციოდ ფაქტობრივად, უვარგისია“, – ამბობს მეჭიაური.
თიანეთის არჩეული მერი სტრუქტურულ რეორგანიზაციას გეგმავს და დახმარებისთვის არასამთავრობო სექტორს მიმართავს.
1 ნოემბერს თიანეთის საოლქო კომისიამ გამარჯვებულად თამაზ მეჭიაური გამოაცხადა. 27 ოქტომბერს თბილისის სააპელაციო სასამართლომ თიანეთის მერის არჩევნებთან დაკავშირებით, მეჭიაურის სასარგებლოდ გამოტანილი მცხეთის რაიონული სასამართლოს გადაწყვეტილება ძალაში დატოვა.