„საზოგადოებრივი მაუწყებელი” ჯიქიას ქუჩაზე გადადის. აღნიშნული ინფორმაცია დღეს, პარლამენტის პლენარულ სხდომაზე გახდა ცნობილი.
ოპოზიცია დაინტერესდა, რა ბედი ეწევა ტენდერს, რომელიც გამოცხადდა და იმ გამარჯვებულ კომპანიას, რომელმაც ტენდერი მოიგო მაუწყებლისთვის ახალი შენობის აშენებაზე.
ეკა ბესელიამ უმცირესობის წევრს რომან გოცირიძეს გავრცელებული ინფორმაცია შეუსწორა და განაცხადა, რომ „საზოგადოებრივი მაუწყებელი” ლუბლიანას ქუჩაზე კი არა, ჯიქიას ქუჩაზე გადადის.
„ბატონი რომანის გამოსვლის კიდევ ერთი არასწორი პასაჟი უპასუხოდ არ შემიძლია დავტოვო. შენობა ფუფუნება არ არის. შენობა აუცილებლობაა. სხვათა შორის, ინფორმაციისთვის – „საზოგადოებრივი მაუწყებელი” გადადის ჯიქიაზე და არა – ლუბლიანაზე. ცნობისთვის ესეც, რომ თქვენთვის დააზუსტოთ. კარგი იქნებოდა, აქამდეც მოგეკითხათ. ალბათ, ნამყოფი ხართ იმ შენობაში, სადაც ეს ტელევიზია მაუწყებლობს. წლების განმავლობაში ამდენი მილიონი რომ იხარჯებოდა, ინფრასტრუქტურულად, ტექნიკური აღჭურვით, მაუწყებელი ამ მდგომარეობაში რატომ იყო და მაშინ რა ხდებოდა? რას შვრებოდით? – ეს მაინც გეკითხათ. დანარჩენი, ახლა რაც კეთდება, არის სწორედ იმისთვის, რათა ტელევიზია ისეთი იყო, რომ მაუწყებელი საზოგადოების ინტერესებს პასუხობდეს და საზოგადოების ინტერესებს ემსახურებოდეს”, – განაცხადა ეკა ბესელიამ.