„თბილსერვის ჯგუფი“ ნაგავშემკრები კონტეინერების დაცლას ღამის საათებში 32 ქუჩაზე, 2018 წლის პირველი მარტიდან დაიწყებს.
ღამის გრაფიკზე გადასვლა საპილოტე პროექტის ფარგლებში განხორციელდება და საწყის ეტაპზე ვაკის პარკიდან უნივერსიტეტის პირველ კორპუსამდე ლოკაციას და აღნიშნული ტერიტორიის მიმდებარედ არსებულ როგორც ცენტრალურ, ასევე შიდა ქუჩებს მოიცავს. ამის შესახებ განცხადება დედაქალაქის მერის მოადგილემ, მაია ბითაძემ გააკეთა.
„ღამის გრაფიკზე გადასვლა, საპილოტე პროექტის ფარგლებში განხორციელდება და თავდაპირველად, ვაკის პარკიდან უნივერსიტეტის პირველ კორპუსამდე ლოკაციას და აღნიშნული ტერიტორიის მიმდებარედ არსებულ, როგორც ცენტრალურ ასევე, შიდა ქუჩებს მოიცავს.
საპილოტე პროექტის ფარგლებში, „თბილსერვის ჯგუფის” ნაგავმზიდი მანქანები 22:00 საათიდან იმოძრავებენ და 32 ქუჩაზე, 400-მდე ნაგავშემკრები კონტეინერის დაცლას მოახდენენ”, – განაცხადა მაია ბითაძემ.
მისი განცხადებით, საპილოტე პროექტი შემდეგ ქუჩებზე განხორციელდება: ჭავჭავაძის გამზირი, აბაშიძის ქუჩა, ფალიაშვილის ქუჩა, ბერძენიშვილის ქუჩა, მუხაძის ქუჩა, კავსაძის ქუჩა, ბაზალეთის ქუჩა, ერისთავის ქუჩა, ნაფარეულის ქუჩა, ბარნოვის ქუჩა, არაყიშვილის ქუჩა, ტაბიძის ქუჩა, რადიანის ქუჩა, მცხეთის ქუჩა, შატბერაშვილის ქუჩა, ჯანაშვილის ქუჩა, ქუთათელაძის ქუჩა, ატენის ქუჩა, რაზმაძის ქუჩა, ელიავას ქუჩა, ცხვედაძის ქუჩა, მარუხის გმირების ქუჩა, ქობულეთის ქუჩა, ჩოლოყაშვილის ქუჩა, რამიშვილის ქუჩა, გაბაშვილის ქუჩა, ყიფშიძის ქუჩა, აბულაძის ქუჩა, მარაბდის ქუჩა, მოსეშვილის ქუჩა, დარიალის ქუჩა, კეკელიძის ქუჩა.
მაია ბითაძის განცხადებით, რკინის კონტეინერები პლასტმასის ნაგავშემკრები კონტეინერებით შეიცვლება, რომელთა დაცლაც ხმაურს არ გამოიწვევს.
რაც შეეხება თბილისის სხვა უბნებში აღნიშნული პროექტის განხორციელებას, ბითაძის განცხადებით, მოსაწესრიგებელია ინფრასტრუქტურა, რაზეც მუშაობას მერია უახლოეს მომავალში დაიწყებს.