“ჩვენი პატრიარქი, როგორც მოსე წინასწარმეტყველი, 40 წლის განმავლობაში მიუძღოდა და მიუძღვის ჩვენს ერს აღთქმული ქვეყნისკენ”

სრულიად საქართველოს კათოლიკოს-პატრიარქის, ილია მეორის აღსაყდრებიდან 40 წლისთავთან დაკავშირებით,  ხვალ დილით სვეტიცხოვლის საკათედრო ტაძარში საზეიმო წირვა ჩატარდება. დღეს ილია მეორეს საზეიმო თარიღი მისმა მოსაყდრემ, მეუფე შიომ მიულოცა.

“ხვალ არის დიდი დღესასწაული ჩვენი ერისა და ეკლესიის – არის 40 წლის იუბილე ჩვენი კათოლიკოს-პატრიარქის, უწმინდესისა და უნეტარესი ილია მეორის აღსაყდრებიდან. დღეს კიდევ ერთხელ ვსარგებლობ შემთხვევით და ვულოცავ ჩვენს ძვირფას პატრიარქს ამ დღეს, რამეთუ იგი 40 წლის განმავლობაში და მანამდეც, როდესაც მღვდელმთავარი იყო, მიუძღოდა და მიუძღვის ჩვენს ერს, როგორც მოსე წინასწარმეტყველი, აღთქმული ქვეყნისკენ, უფლისკენ, სწორედ უფლის სიხარულში, უფლის სერობაში მონაწილეობისკენ. ამიტომ ვუსურვოთ დღეგრძელობა, სიხარული, გამარჯვებები და მასთან ერთად მოვესწროთ მრავალ გამარჯვებას ჩვენი ერისა ეკლესიისა და ჩვენს გამთლიანებას“, – განაცხადა მეუფე შიომ.