„საქმის მასალებით ირკვევა და დაკითხული ადამიანები საუბრობენ, რომ სამსონ ქუთათელაძეს დაპირისპირება ჰქონდა გარკვეულ პირებთან, რომლებიც მას ფულის გადახდას სთხოვდნენ“, – აცხადებს გენერალ ქუთათელაძის მკვლელობის გამოძიების ფარგლებში დაკავებული და შემდეგ გათავისუფლებული გიორგი ჭანტურიას ადვოკატი ანი კეკენაძე.
ადვოკატს არ დაუკონკრეტებია ვისთან რა სახის დაპირისპირება ჰქონდა ქუთათელაძეს და ვინ სთხოვდა მას ფულის გადახდაას, თუმცა „პრაიმტაიმისთვის“ ცნობილი გახდა, რომ საუბარია ე.წ. სტამბულის ბაზრობის ერთ-ერთ ყოფილ მეწილე დავით ბლუაშვილზე.
ბლუაშვილი გამოძიების კითხვებს რამდენიმე საათის განმავლობაში პასუხობდა. „პრაიმტაიმთან“ საუბრისას დავით ბლუაშვილი გამოძიებისთვის ჩვენების მიცემას ადასტურებს, თუმცა, სხვა დამატებით კითხვებზე მან პასუხის გაცემა არ ისურვა.
ცნობილია, რომ 2010 წელს მას და მის ოჯახს შპს „ერთობის“ („სტამბულის ბაზრობა“) წილის დათმობას სთხოვდნენ. საბოლოოდ მეწილეების წინააღმდეგ სისხლის სამართლის საქმეც აღიძრა. დავით ბლუაშვილს – 10 წლით, დედამისს ლიანა აბაიძეს კი დაუსწრებლად 14 წლით თავისუფლების აღკვეთა მიუსაჯეს. ასევე, დააპატიმრეს კიდევ ერთი მეწილის, ზურაბ ჭანტურიას ვაჟი გიორგი ჭანტურია, რომელიც მხოლოდ წილის დათმობის შემდეგ გაათავისუფლეს. სწორედ აღნიშნული პიროვნება დააკავეს სამსონ ქუთათელაძის მკვლელობის გამოძების ფარგლებში, თუმცა, მოგვიანებით ის გაათავისუფლეს. აღმოჩნდა, რომ ქუთათელაძის მკვლელობის მომენტში ჭანტურია მამასთან ერთად ბანკში იმყოფებოდა.
გამოცემისთვის ცნობილია, რომ თავის დროზე, წილების დათმობის მომენტში გიორგი ჭანტურიამ დავით ბლუაშვილისა და ლიანა აბაიძის წინააღმდეგ მისცა ჩვენება. გაირკვა, რომ მას ჩვენება პარტნიორების წინააღმდეგ იძულებით დააწერინეს.
წილების დათმობის შემდეგ ეწ. სტამბულის ბაზარი რუსთავის მუნიციპალიტეტს გადაეცა, მოგვიანებით კი, ის ებრაელი ინვესტორების საკუთრებაში აღმოჩნდა, რომელთაც ოფიციალურად სამსონ ქუთათელაძე წარმოადგენდა. ის პირადადაც ფლობდა შპს-ს 29%-იან წილს.
ხელისუფლების შეცვლის შემდეგ ჭანტურიების ოჯახს საკუთარი წილის ნაწილი დაუბრუნდა. როგორც ჩანს, მათ სამსონ ქუთათელაძესთან ურთიერთობა დაალაგეს და ამჟამადაც ე.წ. სატმბულის ბაზარში რამდენიმე სავაჭრო დახლსა და მაღაზიას ფლობენ. განსხვავებით ლიანა აბაიძისგან, რომელიც მიყენებული ზიანის ანაზღაურებას დღემდე უშედეგოდ ითხოვს. სწორედ აბაიძის შვილი გახლავთ დავით ბლუაშვილი. „პრაიმტაიმის“ მოპოვებული ინფორმაციით ირკვევა, რომ ის სწორედ ქუთათელაძეს სთხოვდა მიყენებული ზარალის ანაზღაურებას. აბაიძის ოჯახმა, შესაბამისი საჩივრით, პროკურატურასაც მიმართა.
პროკურატურაში აცხადებენ, რომ შპს „ერთობის“ წილების დათმობის საქმეზე გამოძიება ამჟამადაც გრძელდება. სხვა დამატებით დეტალებზე საგამოძიებო ორგანომ საუბარი არ ისურვა. მათ შორის უპასუხოდ რჩება კითხვა, როდის დაბრუნდა ქვეყანაში დავით ბლუაშვილი, რომელსაც 2011 წელს დაუსწრებლად 10 წლიანი პატიმრობა მიუსაჯეს და ძებნა გამოაცხადეს? როგორ და რა ვითარებაში მოეხსნა მას ბრალი და დაკითხულია თუ არა წილების დათმობის საქმეზე თავად სამსონ ქუთათელაძე?
„პრაიმტაიმი“ დამატებითი განმარტებებისთვის გიორგი ჭანტურიას ადვოკატს ანი კეკენაძეს დაუკავშირდა. ის არ უარყოფს რომ პირი, რომელიც მკვლელობამდე ცოტა ხნით ადრე სამსონ ქუთათელაძეს თანხის გადახდას სთხოვდა, სწორედ დავით ბლუაშვილია. ადვოკატი ამბობს, რომ ქუთათელაძის მკვლელობის საქმეზე გიორგი ჭანტურიას დაკავება სხვა ადამიანების ინტერესებშიც შედიოდა.
„პრაიმტაიმის“ ინფორმაციით, პირი, რომელზეც თქვენ საუბრობდით, ყოფილი მეწილე – დავით ბლუაშვილია… შეგიძლიათ დაგვიდასტუროთ?
გამოძიების ინტერესებიდან გამომდინარე, არ მაქვს უფლება ამ თემაზე ვისაუბრო, თუმცა, შემიძლია გითხრათ, რომ აღნიშნულ ინფრომაციას არც უარვყოფ და არც ვადასტურებ. საქმის მასალებით ირკვევა, რომ გარკვეულ პირებს ნამდვილად ჰქონდათ დაძაბული ურთიერთობა აწ გარდაცვლილთან და მათ შორის იყვნენ ყოფილი მეწილეებიც. მოწმეები საუბრობენ, რომ მათ შორის გარკვეული დაპირისპირებები ახლაც გრძელდებოდა.
კონკრეტულად ვინ საუბრობს ამას?
მოწმეები, რომლებმაც პირადად მოისმინეს ეს საუბრები და ჰქონდათ ინფორმაცია ამ დაპირისპირების შესახებ. არიან ადამიანები, რომლებიც საკუთარ ჩვენებაში ჰყვებიან, რომ გარკვეული პირები სამსონ ქუთათელაძეს თანხებს სთხოვნენ.
„პრაიმტაიმმა“ ასევე გაარკვია, რომ კომპანიაში, რომლის მეწილე ყოფილი დეპუტატი, გენერალი სამსონ ქუთათელაძე გახლდათ, ერთი თვის წინ ერთ-ერთი მფლობელი შეიცვალა. კერძოდ, 2017 წლის 5 დეკემბერს შპს ერთობის 28%-იანი წილის მფლობელი დავით შატო-შათაშვილი გახდა. მანამდე აღნიშნულ წილს ებრაელი ბიზნესმენი პინჰას ბაიტერი ფლობდა.
ბაზრობის 28% კიდევ ერთი ებრაელი ბიზნესმენის, იუზელ ნონის საკუთრებაა, 15%-ს ფლობს თვითმმართველი ქალაქი რუსთავი, 29% კი სამსონ ქუთათელაძეს ეკუთვნოდა.
გავრცელებული ინფორმაციით, გარკვეული უთანხმოება ამჟამინდელ მეწილეებს შორისაც არსებობდა. იუზელ ნონი გამოძიებამ უკვე რამდენჯერმე დაკითხა.
რაც შეეხება პინჰას ბაიტერს, მისი სახელი დაკავშირებულია იარაღით ვაჭრობასთან. წარსულში ის გახლდათ შპს GLOBAL DEFENSE GROUP-ის პარტნიორი. კომპანიაში აცხადებენ, რომ მათი საქმიანობის სფერო იარაღითა და სარძოლო ატრიბუტიკით ვაჭრობაა, თუმცა, ბაიტერი ამჟამად არც ამ კომპანიაში ფლობს წილს.
შეგახსენებთ, რომ გენერალი სამსონ ქუთათელაძე საკუთარ კაბინეტში მოკლული იპოვეს. მას ცეცხლნასროლი ჭრილობები აღენიშნებოდა. დანაშაულის მოტივი და თავდამსხმელის ვინაობა ჯერ-ჯერობით უცნობია. გამოძიება სსკ-ის 108-ე და 236-ე მუხლებით მიმდინარეობს, რაც განზრახ მკვლელობასა და იარაღის უკანონო შეძენა-შენახვა-ტარებას გულისხმობს.