მეტროში ჭერის ჩამონგრევის შედეგად დაშავებულების მდგომარეობაზე ექიმი კომენტარს აკეთებს

მეტროსადგურ “ვარკეთილში” ჭერის ჩამონგრევის შედეგად დაშავებული ადამიანები სხვადასხვა კლინიკაში გადაიყვანეს. როგორც სამედიცინო ცენტრ “ოპტიმალ მედის” ექიმი დავით შათირიშვილი აცხადებს, მასთან მყოფ პაციენტს თვალ-ბუდის არეში ჭრილობა და მარცხენა კვირისტავის მოტეხილობა აღენიშნება. მისივე თქმით, სიცოცხლისთვის შეუსაბამო დაზიანება გამოხატული არ არის.
“ჩვენთან მოიყვანეს ერთი პაციენტი, რომელსაც მარცხება თვალ-ბუდის არეში აღენიშნება ჭრილობა და მარცხენა კვირისტავის მოტეხილობა, ამ დროისთვის მდგომარეობა სტაბილურია და სიცოცხლისთვის შეუსაბამო დაზიანება გამოხატული არ არის, მიმდინარეობს დაკვირვება. დღეს სახლში ვერ გაეწერება პაციენტი, რადგან საოპერაციო შემთხვევაა”,-განაცხადა ექიმმა.
ოთხი დაშავებული პაციენტი კი ინგოროყვას საუნივერსიტეტო კლინიკაშია გადაყვანილი. ექიმი რეანიმატოლოგის, კონსტანტინე მუმლაძის ინფორმაციით, ძირითადად თავის ტვინის, გულ-მკერდის, წელის და ქვედა კიდურის ტრავმები აღენიშნებათ დაშავებულებს.
“ოთხი პაციენტია მოყვანილი შემთხვევის ადგილიდან, გამოხატულია თავის ტვინის, გულ-მკერდის, წელის და ქვედა კიდურის ტრავმები. ამჟამად მიმდინარეობს კვლევები, მკურნალობა. ამ ეტაპზე არც ერთი პაციენტის სიცოცხლეს საფრთე არ ემუქრება”,-განაცხადა კონსტანტინე მუმლაძემ.
შეგახსენებთ, დღეს მეტროსადგურ “ვარკეთილში” ჭერი ჩამოინგრა, რა დროსაც დაშავდა 11 ადამიანი.