აშშ-ის საელჩო საქართველოს მოქალაქეებს მიმართავს

„თუ დანიშნული გაქვთ სავიზო გასაუბრება ან ამერიკის მოქალაქეთა მომსახურების თაობაზე შეხვედრა, გთხოვთ, გამოცხადდეთ საელჩოში შეთანხმებულ დროს”,- ამის შესახებ ინფორმაციას აშშ-ის საელჩო ავრცელებს.
ამერიკის შეერთებული შტატების მთავრობის მიერ, მუშაობის შეჩერების გამო, საქართველოს მოქალაქეებს და იმ პირებს, ვისაც სავიზო გასაუბრება აქვთ დანიშნული, საელჩოში გამოცხადებისკენ მოუწოდებენ.
ამასთან, როგორც საელჩოს მიერ გავრცელებულ ინფორმაციაშია ნათქვამი, საქართველოში აშშ-ის საელჩოს საკონსულო მომსახურება, კონგრესის მიერ საბიუჯეტო სახსრების ასიგნირებამდე გაგრძელდება.
მათივე განმარტებით, აშშ-ის მთავრობის მუშაობის აღდგენამდე, საქართველოში საელჩოს Facebook-გვერდი რეგულარულად არ განახლდება, გარდა საგანგებო და უსაფრთხოების შესახებ ინფორმაციისა.
„თუ დანიშნული გაქვთ სავიზო გასაუბრება ან ამერიკის მოქალაქეთა მომსახურების თაობაზე შეხვედრა, გთხოვთ, გამოცხადდეთ საელჩოში შეთანხმებულ დროს. აშშ-ის მთავრობის მუშაობის აღდგენამდე, ეს გვერდი რეგულარულად არ განახლდება, გარდა საგანგებო და უსაფრთხოების შესახებ ინფორმაციისა“, – ნათქვამია ინფორმაციაში.
შეგახსენებთ, რომ აშშ-ის მთავრობამ მუშაობა შეაჩერა. 2018 წელს, აშშ-ის მთავრობამ მეორედ შეაჩერა მუშაობა მას შემდეგ, რაც სენატორმა რენდ პოლმა დაბლოკა კენჭისყრა სენატში ორწლიან საბიუჯეტო გეგმაზე, რაც სახელმწიფო ხარჯების ზრდას ითვალისწინებს.
აშშ-ის მთავრობამ მუშაობა 2018 წელს პირველად 19 იანვარს შეაჩერა, მაგრამ 23 იანვარს განაახლა, მას შემდეგ, რაც პრეზიდენტმა დონალდ ტრამპმა ხელი მოაწერა რეზოლუციას, რომლის თანახმადაც, დროებითი სამთავრობო დაფინანსება 2018 წლის 8 თებერვლამდე გაგრძელდა.