„გვაქვს სურვილი, დედაქალაქში არსებული რეალობა შევცვალოთ, რისთვისაც ძალიან ბევრი და მნიშვნელოვანი პროექტის განხორციელებას ვგეგმავთ”, – ამის შესახებ თბილისის მერმა კახა კალაძემ სარეკლამო კომპანიების წარმომადგენლებთან შეხვედრისას განაცხადა.
„გვინდა, რომ დაგეგმილი პროექტების შესახებ ინფორმაცია საზოგადოებას სწორად მივაწოდოთ. ის, რაც კეთდება, საზოგადოებისთვისაა. ამიტომ, მაქსიმალურად უნდა ვეცადოთ, რომ პროექტების განხორციელებაში მეტი მოქალაქე იყოს ჩართული. მინდა, დაგიდასტუროთ ჩვენი მზადყოფნა თანამშრომლობის მხრივ. ერთად გავალამაზოთ ჩვენი დედაქალაქი და ერთობლივი პროექტები განვახორციელოთ”, – განაცხადა კალაძემ.
დედაქალაქის მერიის მიზანია, საზოგადოებრივი კამპანიების განხორციელების პროცესში საჯარო უწყებები, კერძო სექტორი, საზოგადოება და განსაკუთრებით, ახალგაზრდა თაობა ჩაერთოს.
სარეკლამო და საკომუნიკაციო სააგენტოების წარმომადგენლებთან შეხვედრა შეეხებოდა გრძელვადიან კამპანიას – სახელწოდებით #გაუფრთხილდიქალაქს, რომელიც ქალაქის მოფრთხილებასა და ზრუნვას ითვალისწინებს.