ცოტა ხნის წინ „ტოიოტა ცენტრი თბილისის“ ხელმძღვანელი ირაკლი გურჩიანი პაატა ბურჭულაძის მოძრაობას – “სახელმწიფო ხალხისთვის“ გაემიჯნა.
გურჩიანი გაზეთ „კვირის პალიტრასთან“ გადაწყვეტილების მიზეზებს განმარტავს.
ამასთან, ირაკლი გურჩიანი უარყოფს ინფორმაციას, რომ ის თავის დროზე “ნაციონალურ მოძრაობას“ აფინანსებდა.
გურჩიანის თქმით, მას “ნაციონალური მოძრაობა“ აშანტაჟებდა და თანხას იძულებით ახდევინებდა.
„მე ვარ ერთ-ერთი მათგანი, რომელსაც არასოდეს “ნაცმოძრაობა“ არ დაუფინანსებია, თუ არ ჩავთვლით საპრეზიდენტო არჩევნებისთვის გამოძალულ და იძულებით გადახდილ თანხებს, ასევე, გიული ალასანიას უნივერსიტეტისთის ფინანსურ გადარიცხვებს. რადგან თუ შევეწინააღმდეგებოდი, არც ის იყო გამორიცხული, სანაცვლოდ, თავისულება ან სიცოცხლე დამეთმო. ბატონ ივანიშვილს მადლობა მარტო იმისთვის ეკუთვნის, რომ ასეთი არაადამიანები ჩამოაშორა ქვეყანას. მინდა ხაზგასმით ვთქვა, დღეს ერთადერთი ძალა, რომელსაც თავისი მინუსების გამოსწორება და ბევრი კარგი საქმის გაკეთება შეუძლია, “ქართული ოცნებაა“,– აცხადებს გურჩიანი.
„ტოიოტა ცენტრი თბილისის“ ხელმძღვანელი პაატა ბურჭულაძის პოლიტიკური ძალისგან გამიჯვნის მიზეზებსაც განმარტავს.
„მე ბურჭულაძის პარტიის წევრი არ ვყოფილვარ, მხოლოდ “საქართველოს გნვითარების“ ერთ-ერთი თანადამფუძნებელი ვიყავი. თუმცა საპარლამენტო არჩევნებში ბურჭულაძის პარტიიდან რიგით მეორე ნომრად მოვიაზრებოდი. “საქართველოს განვითარების“ ფონდი პოლიტიკური ორგანიზაცია არ იყო. ფონდში არსებობდა სხვადასხვა თემატური ჯგუფი, რომლებიც სხვადასხვა მიმართულებით მუშაობდნენ. მე მინდოდა, რომ ჩვენი ქვეყნის დღევანდელი სიტუაციიდან გამომდინარე, მთავრობისთის საქართველოს განვითარების უკეთესი გეგმა მიგვეწოდებინა და ფონდის ლიდერთან, ბატონ პაატასთან ერთად (წლებია ვმეგობრობთ) აქტიურად ჩავები პრობლემის გამოსასწორებელი გეგმის შემუშავებაში. როგორც კი ფონდი პოლიტიკურ მოქმედებაზე გადავიდა, გავემიჯნე“,- აცხადებს გურჩიანი.