“ევროკავშირთან უვიზო რეჟიმით საქართველოს 192 ათასზე მეტმა მოქალაქემ ისარგებლა“

შს მინისტრის მოადგილის ნინო ჯავახაძის განცხადებით, 1 წლის განმავლობაში, საქართველოს 192 453-მა მოქალაქემ განახორციელა 258 663 ვიზიტი ევროკავშირის/შენგენის ზონაში, ხოლო 1001 ადამიანს უარი ეთქვა საზღვრის გადაკვეთაზე.
როგორც ნინო ჯავახაძემ საგარეო ურთიერთობათა და ევროპასთან ინტეგრაციის კომიტეტების გაერთიანებულ სხდომაზე აღნიშნა, თუ რამდენმა ადამიანმა დაარღვია ევროკავშირში ყოფნის ვადები, ეს მონაცემი გარკვეული მიზეზების გამო შინაგან საქმეთა სამინისტროს არ აქვს.
მისივე განმარტებით, მიმდინარეობს მუშაობა, რომლის მიხედვითაც შემოდგომისთვის უნდა შემცირდეს საქართველოს მოქალაქეების მიერ ევროკავშირის წევრი ქვეყნებისთვის თავშესაფრის მოთხოვნის მაჩვენებლები.
„იმ ღონისძიებებით, რომელსაც ვატარებთ, ვფიქრობთ, შემოდგომამდე შესაძლებელი იქნება თავშესაფრის მოთხოვნის ტენდენცია კლებისკენ შეიცვალოს. საუბარი არ არის იმაზე, რომ აღარავინ აღარ წავა და თავშესაფარს არ მოითხოვს, მაგრამ თვიდან თვემდე ეს ტენდენცია უნდა შეიცვალოს.
1 წლის განმავლობაში, სულ 192 453-მა საქართველოს მოქალაქემ განახორციელა 258 663 ვიზიტი ევროკავშირში, 1001 ადამიანს ეთქვა უარი საზღვრის გადაკვეთაზე. რაც შეეხება ვადების დარღვევას, ჩვენ ეს ციფრი არ გვაქვს. საქართველოს მოქალაქე, რომელიც ჩადის ევროკავშირში, იქედან შეიძლება გადავიდა თურქეთში ან მექსიკაში ან სხვა ქვეყანაში და იქ დარჩა. შეიძლება შეიცვალოს სტატუსიც. შესაბამისად, ჩვენ არ ვიცით ვადების დარღვევებზე ზუსტი მონაცემები“, – განაცხადა ნინო ჯავახაძემ.