ონის მუნიციპალიტეტში გასული ორი დღის განმავლობაში მოსულმა უხვმა ნალექმა გამოიწვია მდინარე ღარულას წყლის დონის მკვეთრი მატება.
ადიდებულმა მდინარემ დააზიანა დამცავი ჯებირი და დატბორა საკარმიდამო ნაკვეთები. ადგილზე მობილიზებულია მძიმე ტექნიკა.
„გუშინ, გამთენიისას დაიწყო ძლიერი წვიმა. მდინარე ღარულა, რომელიც მდინარე რიონს უერთდება, თითქმის შეჩერდა, მოიკლო მისმა დონემ, რაც იმის მანიშნებელი იყო, რომ სადღაც მეწყერი იყო ჩამოწოლილი. მდინარე გუბდებოდა გარკვეული პერიოდი, შემდეგ კი ერთიანად წამოვიდა წყლის ნაკადი და ონის სოფელ ღარის შესასვლელთან დაანგრია 7-8 ჯებირი, გადავიდა სოფლის ტერიტორიაზე და წაიღო სავარგულები და ელექტრო ენერგიის გადამცემი ბოძები.
ამ წუთებში სიტუაცია სტაბულურია, გათენებისთანავე მდინარე დაუბრუნდა კალაპოტს, გაიწმინდა სოფლამდე მისასვლელი გზები და ღარის მოსახლეობის ცხოვრება დაუბრუნდა ჩვეულ რეჟიმს. უკვე მიმდინარეობს ელექტრო ენერგიის აღდგენის პროცესიც“, – განაცხადა ონის მუნიციპალიტეტის მერმა ემზარ საბანიძემ.