პარლამენტის შესასვლელთან მოძრაობა “ლელოსა” და პოლიციას შორის დაპირისპირება მოხდა. მოძრაობის წევრები კახა კოჟორიძე და ანა ნაცვლიშვილი პარლამენტში შესვლას შეეცადნენ, სადაც იურიდიული კომიტეტის სხდომა მიმდინარეობს.
ანა ნაცვლიშვილის და კახა კოჟორიძის განცხადებით, დღეს არ უნდა განწესდეს არც ერთი კანდიდატი უზენაესის მოსამართლედ, რადგან ისინი კეთილსინდისიერების და კომპეტენციის კრიტერიუმებს ვერ აკმაყოფილებენ.
პარალელურად საპროტესტო აქციას მართავს იუსტიციის უმაღლესი საბჭოს არამოსამართლე წევრი ანა დოლიძე. აქციის ლოზუნგია “სია უნდა ჩავარდეს”. ანა დოლიძე მმართველ გუნდს მოუწოდებს, რომ მოსამართლეების სია ჩააგდონ. მისი თქმით, გასაჯაროვდება ყველა იმ დეპუტატის გვარი, ვინც სიას მხარს დაუჭერს.
“ტაბულას” ინფორმაციით, პარლამენტთან მიმდინარე საპროტესტო აქციაზე პოლიციამ საზოგადოებრივი მოძრაობა “ლელოს” წევრი, ირაკლი კუპრაძე დააკავა.
პარლამენტის იურიდიულ საკითხთა კომიტეტში ამ დროისთვის შესვენებაა გამოცხადებული, მანამდე კი ხმაური და პოლიტიკური განცხადებები ისმოდა.
დღეს პარლამენტთან, ჩიტაძის ქუჩაზე სამართალდამცველებმა ოპოზიციის აქციის 12 მონაწილე დააკავეს.
დღეს პარლამენტმა უზენაესი სასამართლოს მოსამართლეობის 20 კანდიდატს უნდა უყაროს კენჭი.
საკონსტიტუციო სასამართლოს თავმჯდომარემ კანდიდატურა მოხსნა, თუმცა პროცედურების მიხედვით ზაზა თავაძეს კენჭს ფორმალურად მაინც უყრიან. ირკვევა, რომ დაამტკიცებენ არა ცხრამეტს, არამედ იმდენს, რამდენიც უზენაესი სასამართლოს ფუნქციონირებისთვის ამ ეტაპზე აუცილებელია.