ქვეყანაში მიმდინარე პოლიტიკურ პროცესებზე, ოპოზიციის მიერ დაანონსებულ ფაქთომასშტაბიან აქციებზე, მოლაპარაკებათა მე-5 რაუნდის შესაძლო შედეგებზე ,,კვირა“ ისტორიის მეცნიერებათა დოქტორს, პროფესორ ედიშერ გვენეტაძეს ესაუბრა:
-ქვეყანას ახალი პრემიერმინისტრობის კანდიდატი ჰყავს, რომელმაც ქართული ოპოზიცია საკმაოდ კრიტიკურლად განაწყო.
-რამდენიმედღიანი პოლიტიკური რყევების შემდეგ, ყველაფერი დალაგდა. ქვეყანას ეყოლება ახალი პრემიერმინისტრი, პრინციპული პოლიტიკოსი და ძარღვიანი ქართველი კაცი, რომელსაც შეუძლია კრიზისული სიტუაციების მართვა, არის კარგი მენეჯერი და არა – ხისტი პოლიტიკოსი, როგორადაც ამას ოპოზიცია წარმოაჩენს. სადაც საჭირო იქნება, იქ დათმობს, სადაც მკაცრი ხელი გახდება აუცილებელი, იქ ქვეყნის ინტერესების გათვალისწინებით იმოქმედებს.
-ოპოზიცია 25 თებერვლისთვის ფართომაშტაბიანი აქციას აანონსებს…
-მოძველდა ეს თემა თითქოს, მაგრამ მაინც უნდა ვთქვა: ბებიაჩემის “ორმოცზე,, ჭარდის ძირას იჯდა იმაზე მეტი ხალხი, დღეს რომ ოპოზიცია გამოიყვანს. ფართომასშტაბიანი აქციების რესურსი დღეს ოპოზიციას არ აქვს. ნახეთ, როგორი ეკლექტიკური გაერთიანებაა ,,ნაციონალური მოძრაობის“ ოფისში. ამბობენ, პროდასავლელები ვართო და ჩახუტებულ-ჩამარყუჟებული ჰყავთ ბურჯანაძე, რომელიც მოსკოვში, კრემლის წინ პარადს იღებდა ოკუპანტების დიდ ყაენთან. მათ ოფისშია ირაკლი ოქრუაშვილი, რომელიც რუსულ ,,ზილებსა“ და სალდათებს მოუძღვოდა წინ და აცხადებდა-ყველა უბედურების მიზეზი საქართველოში ამერიკის საელჩოაო. სწორედ ასეთი ადამიანები არიან დღეს ოპოზიციის იდეოლოგები და იბრძვიან საკუთარი ქვეყნის ჩამოშლისთვის.
-მოლაპარაკებათა მე-5 რაუნდის წინ ნიკანორ მელიას აღმკვეთმა ღონისძიებამ კიდევ უფრო დაამძიმა სიტუაცია.
-მელიას ადგილი ისტორიულად არის სოროში. თუ უფრო სერიოზულად შევხედავთ ამ საკითხს, ,,ნაციონალური მოძრაობის“ ლიდერი უნდა გამოვიდეს ოფისიდან და აღასრულოს კანონის მოთხოვნა. ვფიქრობ მისი, როგორც პარტიის ლიდერის რეიტინგი ამ გზით უფრო ამაღლდება. ოპოზიციასა და პოზიციას შორის დიალოგი უნდა გაგრძელდეს ნებისმიერ თემაზე, გარდა ხელახალი არჩევნებისა და ამ საკითხით მანიპულაცია უნდა დამთავრდეს. დროა, საზოგადოება ერთხელ და სამუდამოდ მიეჩვიოს ქვეყანაში არჩევნების ჩატარების რიგსა და წესს, რომ არჩევნები ყოველ 4 წელიწადში ერთხელ გაიმართება, ამომრჩეველი მივა საარჩევნო უბანში და გააკეთებს საკუთარ არჩევანს, შეცვლის ან არ შეცვლის ხელისუფლებას. თუ ოპოზიციაში ვინმეს, ბურჯანაძეს, ოქრუაშვილს, მელიას, ბობოხიძეს ეჩქარებათ ცვლილებების განხორციელება, ეს ცვლილებები საკუთარ ოჯახებში განახორციელონ. რევოლუციურად ხელისუფლების შეცვლის გეგმა, რომელსაც ქართული ოპოზიცია კარგა ხანია, ამუშავებს, სრულიად განუხორციელებელია.