“ჩემთვის რიგგარეშე არჩევნები არ არის ნომერ პირველი ამოცანა, მასზე საუბარს, რაც დრო გადის, აზრი ეკარგება”, – ამის შესახებ პარლამენტის ვიცესპიკერმა, პარტია “მოქალაქეების” ერთ-ერთმა ლიდერმა, ლევან იოსელიანმა საკონსტიტუციო ცვლილებების საკითხზე საუბრისას განაცხადა.
იოსელიანის თქმით, მისთვის პრინციპულად მნიშვნელოვანია დაბალი ბარიერი და სრულად პროპორციული სისტემა.
„მრავალპარტიული პარლამენტი არის პრინციპულად მნიშვნელოვანი. 5-პროცენტიანი ბარიერის ფარგლებში რომ ჩატარებულიყო 2020 წლის არჩევნები, ნახევარ მილიონამდე ხმა იქნებოდა დაკარგული, ჩვენ თუ არ გვინდა ანალოგიური სურათი მივიღოთ 2024 წლის არჩევნებზე და შესაბამისად, 20 პროცენტზე მეტი ხმების დაიკარგოს, განაწილდეს 2 დიდ პარტიას შორის, რის შედეგად პოლარიზაცია მოიმატებს, პრინციპულად მნიშვნელოვანია დაბალი ბარიერი.
რიგგარეშე არჩევნებზე საუბარს, რაც დრო გადის, აზრი ეკარგება. ჩემთვის რიგგარეშე არჩევნები არ არის ნომერ პირველი ამოცანა. ჩემთვის მნიშვნელოვანია სრულად პროპორციული დაბალი ბარიერის პირობებში ჩატარდეს არჩევნები“, – განაცხადა იოსელიანმა.