ნინო ჩხობაძე – აშკარად გლობალური კლიმატის ცვლილების ფონია სახეზე

გლობალური კლიმატის ცვლილების ფონია აშკარად სახეზე, – ამის შესახებ გარემოსდაცვითი საკითხების ექსპერტმა, ორგანიზაცია „საქართველოს მწვანეები-დედამიწის მეგობრების“ თავმჯდომარემ, ნინო ჩხობაძემ სვანეთში მომხდარი სტიქიის შესახებ საუბრისას, მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა.
ნინო ჩხობაძემ იმ მიზეზების შესახებ ისაუბრა, რამაც, სავარაუდოდ, სტიქია გამოიწვია.
„სავარაუდოდ, უკვე ცნობილია რა იყო ეს. ნენსკრას ხეობაში ასეთი ტიპის წყალდიდობა არ ყოფილა, არცერთ უხუცესს არ ახსოვს ასეთი დონის და მასშტაბის ადიდება ნენსკრაზე. ადიდებული ყოფილა, მაგრამ ასე არა. საკმაოდ დიდი წყალი მოვიდა, საკმაოდ დიდი პრობლემების წინაშე დავდექით.
აქ ჩანს ორი რამ, სავარაუდოა, რომ ერთ-ერთი შენაკადის გამო მოხდა, რომელიც იღებს სათავეს მყინვარიდან. ეტყობა, მყინვარების დნობა ისევ დაწყებულია და ძალიან ინტენსიური დნობა იყო. შესაძლებელია, რომ მოწყდა რაღაცა ენა მყინვარსაც, ჩავარდა წყალში და მერე დაემთხვა ინტენსიური წვიმა, წვიმა იყო ხანმოკლე, მაგრამ ინტენსივობა იყო ძლიერი. შედეგად, ამ ორი მოვლენის დამთხვევამ, სავარაუდოდ, გამოიწვია ის, რომ დიდი მასა დაგროვდა არა უშუალოდ ნენსკრას სათავეში, არამედ ერთ-ერთი შენაკადის სათავეში და იქ მოხდა, სავარაუდოდ, მეწყერის ჩამოწოლა“- განაცხადა ჩხობაძემ.
ჩხობაძემ, სვანეთში განვითარებული პროცესების შესახებ საუბრისას, თბილისში, ვერეს ხეობაში მომხდარი წყალდიდობა გაიხსენა და მასთან პარალელი გაავლო.
„ნენსკრას ხეობაში არის საკმაოდ სერიოზული რამდენიმე მეწყერი, რომელმაც, რამდენადაც ვხვდები, ამ ინტენსიური წვიმს შედეგად, რაღაცა გადაკეტა, დააგროვა წყალი და მერე სერიოზული გარღვევა მოახდინა წყალმა, წამოვიდა ისეთი ნაკადით, რა ნაკადითაც წამოვიდა ვერეს ხეობაში, დაახლოებით ასე. მთის მდინარეა, ისევე, როგორც ვერე არის მთის მდინარე. ალბათ, ეს მოვლენა განვითარდა. გლობალური კლიმატის ცვლილების ფონია აშკარად სახეზე. ეს არის ჩვენი ორგანიზაციის სპეციალისტების ვარაუდი, იმ ინფორმაციაზე დაყრდნობით, რა ინფორმაციაც შევაგროვეთ მოსახლეობაში“- განაცხადა ნინო ჩხობაძემ.
შეგახსენებთ, გარემოს ეროვნული სააგენტოს ინფორმაციით, 5 ივლისს, ღამის საათებში, მდინარე ნენსკრას აუზში, სავარაუდოდ, უხვი ატმოსფერული ნალექის შედეგად, ადიდდა მდინარე ნენსკრა, რამაც ღვარცოფული პროცესების განვითარება გამოიწვია.
სოფელი ჭუბერი და კიდევ რამდენიმე დასახლება გარესამყაროსაა მოწყვეტილი. მდინარის კალაპოტიდან გადმოსვლის გამო, დაიტბორა მიმდებარე ტერიტორია. ჩამოწოლილმა მეწყერმა და მოვარდნილმა ღვარცოფმა სოფლებთან დამაკავშირებელი ხიდები და ორი სახლი წაიღო.