შინაგან საქმეთა სამინისტროში მართლწესრიგის ოფიცრის პოზიციაზე 365 ვაკანსიაზე საერთო ჯამში 3340 განაცხადი შევიდა.
შინაგან საქმეთა სამინისტროს ინფორმაციით, შესაფერისი კანდიდატების შესარჩევად მომდევნო ეტაპი, განაცხადების გადარჩევაა, რის შემდეგაც, მსურველებს უნარ- ჩვევების ტესტი / IQ ტესტირება და გასაუბრება ჩაუტარდებათ.
უწყების განმარტებით, შერჩეული კანდიდატები მართლწესრიგის ოფიცრის სპეციალურ პროფესიულ საგანმანათლებლო პროგრამას შინაგან საქმეთა სამინისტროს აკადემიაში გაივლიან. პოზიციაზე კი მხოლოდ კურსის წარმატებით დასრულების შემთხვევაში დაინიშნებიან. აღსანიშნავია, რომ ახალი წესის თანახმად, აკადემიაში მათი სწავლის 3 თვიანი პერიოდი ანაზღაურებადი იქნება.
შსს-ს ცნობით, შიდა რესურსიდან შერჩეული 66 ოფიცერი გადამზადებას უკვე გადის და მართლწესრიგის პირველი ოფიცრები თბილისის ქუჩებში, კონკრეტულად კი ვაკე-საბურთალოს რაიონებში სექტემბერში გამოჩნდებიან.
ცნობისთვის, შინაგან საქმეთა სამინისტროში შინაარსობრივი და სტრუქტურული რეფორმების პროცესი მიმდინარეობს, რომლის ერთ-ერთი მთავარი შემადგენელია კრიმინალური პოლიციის რეფორმა. სწორედ კრიმინალური პოლიციის რეფორმის ფარგლებში ხდება საუბნო მიმართულების ტრანსფორმაცია, რის შედეგადაც, უბნის ინსპექტორის ნაკლებ ეფექტიანი მოდელის ნაცვლად ინერგება თანამედროვე, მსოფლიოს არაერთ ქვეყანაში აპრობირებული საზოგადოებაზე ორიენტირებული პოლიციის კონცეფცია, რომლის ერთ-ერთ მნიშვნელოვან კომპონენტს მართლწესრიგის ოფიცრის ინსტიტუტი წარმოადგენს.
როგორც შსს-ში განმარტავენ, მართლწესრიგის ოფიცრის ინსტიტუტი ორიენტირებული იქნება პრევენციული ღონისძიებების განხორციელებაზე, დანაშაულისა და სამართალდარღვევების თავიდან აცილების მიზნით.
მართლწესრიგის ოფიცრის კომპეტენციაში შევა ისეთი მნიშვნელოვანი საკითხები, როგორიცაა: არასრულწლოვნებთან, ოჯახში ძალადობასთან, სამეზობლო დავებთან, უკანონო მიგრაციასთან, მოწყვლად ჯგუფებთან დაკავშირებულ პრობლემებსა და გამოწვევებზე რეაგირება.