ბიზნეს სექტორსა და შრომის ინსპექციას შორის გაფართოებული შეხვედრა გაიმართება

14 აგვისტოს, 14:00 საათზე, ბიზნეს გაერთიანება – საქართველოს
დამსაქმებელთა ასოციაციის წევრი და პარტნიორი კომპანიები შრომის
უსაფრთხოების ინსპექციის ხელმძღვანელ პირებთან შეხვედრას გამართავენ.
ბიზნეს სექტორსა და შრომის ინსპექციას შორის პირველად იმართება მსგავსი
მასშტაბის შეხვედრა მას შემდეგ, რაც ინსპექციას სამოქმედო მანდატი გაეზარდა.
შესაბამისად, შეხვედრაზე განსახილველი მთავარი საკითხი იქნება 2018 წლის 1
აგვისტოდან ამოქმედებული კანონი „შრომის უსაფრთხოების შესახებ“, რომელიც
დამსაქმებლებს ავალდებულებს უსაფრთხო და ჯანსაღი გარემოს შექმნას
დასაქმებულებისთვის და ამავდროულად, ითვალისწინებს შრომის უსაფრთხოების
პირობების პერიოდულ ინსპექტირებას შრომის ინსპექციის მიერ.
ორმხრივ შეხვედრაზე ასევე განიხილება შრომისა და ჯანმრთელობის
უსაფრთხოების სფეროში არსებული მოთხოვნები, კომპანიების ინსპექტირების
პროცესები და თემასთან დაკავშირებული სხვა აქტუალური საკითხები.
შეხვედრას, რომელსაც 100-ზე მეტი კომპანიის წარმომადგენელი დაესწრება,
საქართველოს დამსაქმებელთა ასოციაციის პრეზიდენტი ელგუჯა მელაძე და
ჯანდაცვის სამინისტროს შრომის პირობების ინსპექტირების დეპარტამენტის
ხელმძღვანელი ბექა ფერაძე გახსნიან.
შეხვედრა საქართველოს დამსაქმებელთა ასოციაციის საკონფერენციო
დარბაზში გაიმართება.