უზენაესი სასამართლოს თავმჯდომარის კანდიდატის შერჩევასთან დაკავშირებით, პრეზიდენტი გიორგი მარგველაშვილი. როგორც მოიქცა, ამას გაბუტვას დავარქმევდი. ვფიქრობ, რომ სერიოზული შეცდომაა, როდესაც პრეზიდენტი კანდიდატს არ ასახელებს,- ასე აფასებს იუსტიციის უმაღლესი საბჭოს არამოსამართლე წევრი ნაზი ჯანეზაშვილი პრეზიდენტ გიორგი მარგველაშვილის გადაწყვეტილებას, რომ ის არ დაასახელებს უზენაესი სასამართლოს თავმჯდომარის კანდიდატს.
ჯანეზაშვილის განმარტებით, მოქმედი კონსტიტუციის მიხედვით, პრეზიდენტი მარგველაშვილი თავად არის ვალდებული კანდიდატის ნომინირება მოახდინოს. მისი შეფასებით, საზოგადოება არ უნდა დატოვოს ისეთ მდგომარეობაში, რომ სასამართლო სისტემა ჩაუგდოს სააპელაციო სასამართლოს თავმჯდომარეს, მიხეილ ჩინჩალაძეს.
“ჩემი აზრით, პრეზიდენტმა ამ შემთხვევაში, გამოუსწორებელი შეცდომა დაუშვა და ჯერ კიდევ უშვებს გამოუსწორებელ შეცდომას, რადგან ის უზენაესი სასამართლოს თავმჯდომარის კანდიდატს არ ასახელებს. პირველ რიგში, ეს არის პრეზიდენტის კონსტიტუციური ვალდებულება, რომ მან წარადგინოს კანდიდატი. ჩემი აზრით, შეცდომაა ისიც, რომ არასამთავრობო ორგანიზაციებზე გადააქვს მას პასუხისმგებლობა. არასამთავრობო ორგანიზაციები ნამდვილად არ არის მითითებული კონსტიტუციაში მითითებული, როგორც ნომინირების სუბიექტი.ამიტომ ვფიქრობ, რომ ეს არის ძალიან სერიოზული შეცდომა. გარდა ამისა მან, პროცესი თითქოს ისე დაიწყო, რომ უნდოდა კონსულტაციებით შედეგი ჰქონოდა, თუმცა ვფიქრობ,რომ მისი კონსულტაციები წრეებთან არასაკმარისი იყო, ფორმატი ან სტრატეგია შესაბამისად არ ჰქონდა შერჩეული. როგორც ვხედავ, მან არ იცის სასამართლო სისტემაში შიგნით მიმდინარე პროცესები და პროცესებს გარედან აკვირდება. ასეთი შთაბეჭდილება მაქვს, იმიტომ, რომ სასამართლო სისტემა ძალიან სპეციფიკური რგოლია, აქ არის განსხვავებული სიტუაცია. პრეზიდენტს რომ სცოდნოდა, რომ სისტემას მიხეილ ჩინჩალაძე მართავს და ისუტიციის უმაღლეს საბჭოში მისი ხალხია წარმოდგენილი, რომლებიც ნომინირებასთან დაკავშირებით მიიღებენ გადაწყვეტილებას, მაშინ პრეზიდენტი სხვა პასუხისმგებლობით მოეკიდებოდა საკითხს. როგორც ის მოიქცა, ამას გაბუტვას დავარქმევდი სერიოზული მიდგომა არ არის. ვფიქრობ, რომ სერიოზული შეცდომაა, როდესაც პრეზიდენტი კანდიდატს არ ასახელებს, თუმცა არაა გამორიცხული დამოკიდებულება შეიცვალოს”,- განაცხადა ნაზი ჯანეზაშვილმა.
მისივე განცხადებით, ახალი კონსტიტუციის შესაბამისად, იუსტიციის უმაღლეს საბჭოს არ აქვს უფლება ნებისმიერი იურისტი დაასახელოს უზენაესი სასამართლოს თავმჯდომარეობის პოსტზე, პრეზიდენტს კი შეუძლია ნებისმიერი რეპუტაციის მქონე ადამიანი დაასახელოს, რომელიც ნორმებს აკმაყოფილებს.
“ახალი ნორმებით, რომელიც საქართველოს პრეზიდენტის ინაუგურაციის შემდეგ შევა ძალაში, უზენაესის სასამართლოს მოსამართლეთა რაოდენობა 28-მდე უნდა გაიზარდოს. ჯერ არ ვიცი, საბჭოს უმრავლესობა რა გადაწყვეტილებას მიიღებს – ჯერ გაზრდის მოსამართლეთა რაოდენობას 28-მდე და მერე აქედან მოხდება კანდიდატის ნომინირება, თუ მანამდე არსებული რაოდენობის მეშვეობით მიიღებს გადაწყვეტილებას“,- განაცხადა ნაზი ჯანეზაშვილმა.