მე მგონია, რომ ეს ქვეყანა ჩალით არ არის დაფარული და სამართლიანობა იზეიმებს, – ამის შესახებ “თავისუფალი დემოკრატების” ერთ-ერთმა ლიდერმა, ირაკლი ალასანიამ ე.წ. კაბელების საქმის პროცესის დასრულების შემდეგ ჟურნალისტებს განუცხადა.
„დღეს ძალიან ემოციური სხდომა იყო. მსგავსი ემოციური სხდომა არასდროს ყოფილა, იმიტომ, რომ დღეს ხუთივე უდანაშაულო ბრალდებულმა საბოლოო სიტყვა თქვა და ამ სიტყვაში კიდევ ერთხელ გამოიკვეთა, თუ როგორ პატრიოტ და ქვეყნის მოსიყვარულე ვაჟკაც ადამიანებთან გვაქვს საქმე, რომელთაც ერთადერთი რამ უნდათ, რომ ქვეყანა უფრო დაცული და უსაფთხო იყოს. ამისთვის პროკურატურა პოლიტიკური ზეწოლით ბრალს სდებს. მე ვუსმენდი მათ, ვუყურებდი მოსამართლესაც და დავინახე, რომ გარკვეულწილად მოსამართლე ჩაფიქრდა ამ სიტყვის შემდეგ. იმედი მაქვს, რომ სასამართლო მიიღებს სამართლიან გადაწყვეტილებას. ვთვლი, რომ სასამართლო სისტემაში არიან კეთილსინდისიერი ხალხი, რომლის იმედიც უნდა გვქონდეს. მგონია, რომ ეს ქვეყანა ჩალით არ არის დაფარული და სამართლიანობა იზეიმებს“, – განაცხადა ირაკლი ალასანიამ.