ამ მიწიერი ჯოჯოხეთის გავლა ვაჟკაცთა ხვედრია. ჩვენ ციხე არ შეგვაშინებს, არც მე და არც ჩემს მოდგმას, – ამის შესახებ მალხაზ მაჩალიკაშვილმა საქალაქო სასამართლოში ჟურნალისტებთან მას შემდეგ განაცხადა, რაც მის ძმისშვილს, მორის მაჩალიკაშვილს, აღკვეთის ღონისძიების სახით პატიმრობა შეეფარდა.
მისი თქმით, მორის მაჩალიკაშვილს დაურეკეს, რომ მას დაიჭერდნენ თუკი ბიძამისი, მალხაზ მაჩალიკაშვილი, კარავს გაშლიდა.
„ეს ხელისუფლება კრიმინალზეა დაფუძნებული, მაგრამ არაუშავს, ამ მიწიერი ჯოჯოხეთის გავლა ვაჟკაცთა ხვედრია. ჩვენ ციხე არ შეგვაშინებს, არც მე და არც ჩემს მოდგმას. მე აქამდე სახელმწიფო უსაფრთხოების სამსახურს ვებრძოდი იმის გამო, რომ ერთადერთი ვაჟი მომიკლეს. ახლა კი მომიწევს მეორე სტრუქტურას ვებრძოლო, შინაგან საქმეთა სამინისტროს, ნაძირალა გახარიას და ამ ორივე სტრუქტურას მე შევებრძოლები. ვნახოთ ვინ მოიგებს”,-ამბობს მალხაზ მაჩალიკაშვილი. შეგახსენებთ, რომ 20-21 ივნისს, პარლამენტის წინ განვითარებულ მოვლენებზე დაწყებული გამოძიების ფარგლებში ბრალდებულ ოთხივე პირს, მორის მაჩალიკაშვილს, ილია მემარნიშვილს, ბეჟან ლორთქიფანიძეს და გიორგი ქურდოვანიძეს აღკვეთის ღონისძიების სახით პატიმრობა შეეფარდათ.