“რუსთავი 2-ის“ დირექტორი, პაატა სალია ნიკა გვარამიას განცხადებას გამოეხმაურა

ტელეკომპანია „რუსთავი 2-ის“ დირექტორი, პაატა სალია ნიკა გვარამიას განცხადებას გამოეხმაურა, რომლის თანახმადაც წლების წინ, როდესაც ქიბარ ხალვაში “რუსთავი2-ს” ფლობდა, არხის ქონება გაცილებით ნაკლები იყო, ვიდრე ამჟამადაა. სალიას თქმით, ჰაერზე ლაპარაკი კომპანიის ქონების ზრდასთან დაკავშირებით დოკუმენტების გარეშე არ შეიძლება.
„წინასწარ ამაზე ვერაფერს ვიტყვი. დაწერონ სარჩელი შეიტანონ სასამართლოში და, შესაბამისად, ქიბარ ხალვაში იქნება, თუ კომპანია ამაზე აუცილებლად უპასუხებს. სამართლებრივი გზით პასუხს გავცემთ სასამართლოში. ამაზე ზეპირად საუბარი ძალიან რთულია. ჩემთვის ცნობილია, რა ღირებულების იყო იმ დროს ტელეკომპანია, ამაზე ჩვენ სასარჩელო განცხადებაშიც მივუთითეთ და ამის თაობაზე ექსპერტიზის დასკვნებიც არის. დღეს რა ღირებულების არის კომპანია, არ ვიცი. შეიძლება, კომპანია იყოს ნულს ქვევით, იმხელა დავალიანებები აქვს კომპანიას.
მიმართონ სასამართლოს, წარმოადგინონ თავიანთი არგუმენტაცია და დაასაბუთონ თავიანთი მოთხოვნა, ჩვენ ჩვენს პოზიციას დავასაბუთებთ. ჰაერზე ლაპარაკი, რომ გაიზარდა კომპანიის ქონება, არ შეიძლება. თქვენ იცით, რა ტექნიკითაც მუშაობთ; იცით როდის არის ეს ტექნიკა შეძენილი და ძალიან ბევრი რამ არის ქიბარ ხალვაშის დროს შეძენილი და დღემდე მოსული ეს ტექნიკა. აქედან გამომდინარე, საუბარი იმაზე, ვინ დაამატა, რა მოხდა, როგორ მოხდა, შეგვიძლია ვისაუბროთ, მაგრამ ვისაუბროთ დოკუმენტებით. თუ სასამართლოში მიდის ვინმე, ვუპასუხებთ სასამართლოში“, – განაცხადა სალიამ.
შეგახსენებთ, დღეს “რუსთავი 2-ის” ყოფილმა დირექტორმა, ნიკა გვარამიამ განაცხადა, რომ მაშინ, როდესაც ტელევიზიას ქიბარ ხალვაში ფლობდა, “რუსთავი 2-ის” ქონება გაცილებით ნაკლები იყო, ვიდრე ამჟამადაა.