ტენდენციაა ბოლო თვეების განმავლობაში წარმატებულ სპორტსმენებზე, წარმატებულ ადამიანებზე თავდასხმა, – ამის შესახებ თბილისის მერმა, კახა კალაძემ ჟურნალისტებთან საუბრისას განაცხადა.
კახა კალაძე გამოეხმაურა ბოლო პერიოდში ქართველი სპორტსმენების, მათ შორის ქართველი მორაგბეების მიმართ პოლიტიკურ და შეურაცხმყოფელ განცხადებებს, მათ შორის „ლეიბორისტული პარტიის“ ლიდერის შალვა ნათელაშვილის გუშინ, სოციალური ქსელის საშუალებით გავრცელებულ განცხადებას.
„ეს არის დეგრადირებული ადამიანების მხრიდან გაკეთებული განცხადებები. ჩვენი წარმატებულ სპორტსმენებით ამაყობს მთელი ქვეყანა, მთელი ერი, ჩვენი ქვეყნის სახელი გააქვთ საზღვრებს გარეთ. ყველა ერთად ვზეიმობთ, როდესაც ისინი იმარჯვებენ. შესაბამისად, ამ ადამიანების კრიტიკა, გაუაზრებელი თუ გააზრებული განცხადებები და ტალახის სროლა ვერაფერს დააკლებს ვერც ტალახაძეს, ვერც ჩვენ მორაგბეებს. მორაგბეების ფრჩხილის ფასად არ ღირს არც ერთი ის ადამიანი, ვინც შეურაცხყოფას აყენებს ჩვენს წარმატებულ სპორტსმენებს. მე მინდა ჩვენს სპორტსმენებს წარმატებები ვუსურვო და ვუთხრა, არანაირად არ მიაქციონ ყურადღება ასეთი დეგრადირებული ადამიანების მხრიდან გაკეთებულ ამაზრზენ განცხადებებს“, – განაცხადა კახა კალაძემ.