სადელიმიტაციო-სადემარკაციო კომისიის თავმჯდომარის მოადგილე მალხაზ მიქელაძე გენერალურ პროკურატურაში დღესაც მივა.
გუშინ მალხაზ მიქელაძე გენერალურ პროკურატურაში მეორედ გამოიკითხა. როგორც მან მედიასთან კომენტირაბისას განაცხადა, გამოკითხვა დამაზუსტებელი ხასიათის იყო და მოიცავდა კომისიის მუშაობის სპეციფიკის გაცნობასა და ტექნიკური დეტალების დაზუსტებას.
მიქელაძის ადვოკატის, ივანე ჩიტაშვილის თქმით, კითხვების ნაწილი კრიტიკული იყო და სცდებოდა მისი დაცვის ქვეშ მყოფის კომპეტენციას. მისივე თქმით, მალხაზ მიქელაძის გამოკითხვა ოფიციალურად, გამოკითხულის ხელმოწერით არ დასრულებულა, სწორედ ამიტომ მისი დაცვის ქვეშ მყოფი საგამოძიებო უწყებაში უკვე დღეს, 11:00 საათზეა დაბარებული.
აღსანიშნავია, რომ საგარეო საქმეთა სამინისტროს მეზობელი ქვეყნების დეპარტამენტის დირექტორი და ამავდროულად სადემარკაციო-სადელიმიტაციო კომისიის მოქმედი თავმჯდომარის მოადგილე მალხაზ მიქელაძე 2004-2005 წლებში კომისიის თავმჯდომარეც იყო.
7 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.