ჩვენმა პოლიტიკურმა გუნდმა მაქსიმალურად გამოიყენა მოლაპარაკებებისთვის ის ვადა, რომელიც შეგვეძლო გამოგვეყენებინა, რომ პარლამენტში ოპოზიციური სპექტრის სრული წარმომადგენლობა შემოსულიყო, – ამის შესახებ აგრარულ საკითხთა კომიტეტის თავმჯდომარემ, ნინო წილოსანმა განაცხადა.
„მოლაპარაკების პროცესში ჩვენ ყველაფერი გავაკეთეთ იმისათვის, რომ კონსენსუსი მიღწეულიყო. ეს იყო მაქსიმუმი, რისი გაკეთებაც იმ ობიექტურ მოცემულობაში შეგვეძლო, რაც დაისახა პარალელური დათვლის შედეგების გამომზეურებით, რომ არასწორი იყო ციფრები, რაზეც ოპოზიცია აპელირებდა. ამასთანავე, შესაძლოა თითოეული დეპუტატი განსხვავებულად უდგებოდეს ამ საკითხს და ზოგიერთი თვლიდეს, რომ, ფაქტობრივად, დემოკრატიის მოღალატე ოპოზიციონერი დეპუტატები არ უნდა იმსახურებდნენ პარლამენტში ყოფნას, მაგრამ გარწმუნებთ, რომ ჩვენი საბოლოო გადაწყვეტილება გუნდური პრინციპით იქნება მიღებული და შესაბამისად, როდესაც კენჭისყრა გაიმართება, გუნდის პოზიციას შეიტყობთ“, – განაცხადა წილოსანმა.