ჩვენი მოლოდინი არის კვლავ პოზიტიური, რომ ეს მოლაპარაკებები წარმატებით დასრულდება, ამის იმედს გვაძლევს ის, რომ ევროკავშირის მხრიდან არის მაღალი ჩართულობა, – ამის შესახებ პარლამენტის თავმჯდომარემ, არჩილ თალაკვაძემ კრისტიან დანიელსონთან შეხვედრის შემდეგ განაცხადა.
„ძალიან კომპეტენტური ადამიანები განიხილავენ ჩვენთან ერთად საკითხებს, რომელიც მოლაპარაკებების მაგიდაზე დევს. ეს ერთი. მეორე, არც ბატონ დანიელსონს და არც ჩვენ არ გვითქვამს, რომ დღეს შედგებოდა შეთანხმება, ჩვენ ვთქვით, რომ პოზიციების დაახლოება ხდება. ახლაც შემიძლია გითხრათ იგივე. რჩება საკითხები, რაზეც პოზიციები არის კიდევ დასაახლოებელი. შესაბამისად, მოლაპარაკებები გრძელდება და ჩვენ იმედი გვაქვს, რომ ეს მოლაპარაკება დასრულდება კონკრეტული შედეგით“, – განაცხადა თალაკვაძემ.
პარლამენტის თავმჯდომარის თქმით, მმართველი გუნდი ამ ეტაპზე ოპოზიციის მხრიდან ელის ნაბიჯწბს.
„ველით ნაბიჯებს ოპოზიციის მხრიდან, რაც ვფიქრობ უკვე მოგვცემს საშუალებას, რომ პოზიციები დავაახლოოთ და დავასრულოთ ეს დიალოგი კონკრეტული მოლაპარაკებით. ვფიქრობ, არასწორია პოზიციონირება, რაც ხშირად ხდება მედიაში, თითქოს ოპოზიციას უნდა ისე წარმოაჩინოს, რომ ეს შეთანხმება მარტო ხელისუფლებას სჭირდება. მერწმუნეთ, თუ ვინმეს სჭირდება დღეს პოლიტიკურ პროცესში ჩართვა, პარლამენტში დაბრუნება და ის გადაწყვეტილებები, რომელიც მისაღებია, რომ იყოს მათი ჩართულობით განხილული, ეს არის ოპოზიციის ფრთა, რომელთანაც ახლა გვაქვს მოლაპარაკება“, – განაცხადა თალაკვაძემ.