პოლიტიკურ მიკერძოებას მედია ხშირად მოვლენის არსის შეგნებულ დამახინჯებამდე მიჰყავს, ზოგჯერ კი ფაქტი ან ამბის მნიშვნელოვანი გარემოება, შესაძლოა, სიუჟეტიდან საერთოდ „გაქრეს“ კიდეც, რის შედეგადაც, მაყურებელს აბსოლუტურად არასწორი წარმოდგენა უყალიბდება გაშუქებულ საკითხთან დაკავშირებით.
ამგვარი მანიპულაცია ვიხილეთ 26 აპრილს, ტელეკომპანია „პირველის“ 15:00 საათის საინფორმაციო გამოშვებაში, სადაც პატიმართა მიმართ დამამცირებელი და არაადამიანური მოპყრობის ბრალდებით, სასჯელაღსრულების დეპარტამენტის გლდანის მე-8 დაწესებულების ყოფილი თანამშრომლის დაკავების ფაქტი გააშუქეს.
სიუჟეტიდან მაყურებელი იგებს, რომ პროკურატურის მიერ დაკავებული ციხის ყოფილი თანამშრომელი გ.ა. დაწესებულების სხვა თანამშრომლებთან ერთად, ჯგუფურად, პატიმრებს ფიზიკურად უსწორდებოდა და ღირსებისა და პატივის შემლახავ მდგომარეობაში აყენებდა.
„პატიმრები საკნებიდან გადაჰყავდათ, აბანოებში ათავსებდნენ, სადაც ჯგუფურად, ხელკეტებისა და სხვადასხვა საგნების გამოყენებით ფიზიკურად უსწორდებოდნენ. ირკვევა, რომ იყო სექსუალური ხასიათის მუქარაც“, – გვაუწყებს გამოშვების წამყვანი, თუმცა, მიუხედავად დანაშაულის ასეთი დეტალური აღწერისა, მთელი სიუჟეტის მანძილზე არც ერთხელ არ დაკონკრეტებულა რა პერიოდს უკავშირდება სასტიკი სისტემური დანაშაულის შემცველი ინფორმაცია, შესაბამისად, მაყურებლისთვის გაუგებარია, რომელი ხელისუფლების პასუხისმგებლობა შეიძლება იყოს პატიმრების წამებისა და არაადამიანური მოპყრობის პრაქტიკა პენიტენციურ სისტემაში.
რეალურად, საქმესთან დაკავშირებით პროკურატურის სახელით გაკეთებულ განცხადებაში პროკურორი ია დარჯანია აღნიშნავს, რომ საუბარია 2010-2012 წლებში ჩადენილ დანაშაულზე, ხოლო პროკურატურის ვებგვერდზე განთავსებულ ინფორმაციაში კიდევ უფრო კონკრეტულად არის განმარტებული, რომ დანაშაული ხდებოდა 2012 წლის ოქტომბრამდე, თუმცა ტვ „პირველის“ სიუჟეტში პროკურორ დარჯანიას ფრაზა დამონტაჟებულია ისე, რომ 2010 წელი საერთოდ ამოღებულია და განცხადების ვიდეოჩანაწერის ფრაგმენტი პირდაპირ ასე იწყება: „2012 წლებში (?!) სასჯელაღსრულების დეპარტამენტის N8 დაწესებულების უსაფრთხოების განყოფილების ყოფილი თანამშრომელი გ.ა. და ამავე დაწესებულების სხვა თანამშრომლები ჯგუფურად, დასჯისა და დაშინების მიზნით პატიმრებს ფიზიკურად უსწორდებოდნენ…“
ამგვარად, აშკარაა, რომ ტელეკომპანია „პირველი“ აღნიშნულ სიუჟეტში მანიპულაციური ხერხით შეეცადა დაემალა სასტიკი დანაშაულის კავშირი წინა ხელისუფლებასთან, რის შედეგადაც მაყურებელმა ვერ მიიღო ობიექტური და რეალური ინფორმაცია გაშუქებული მოვლენის შესახებ.
წყარო: მედიაკრიტიკა