საქართველოს გარშემო არსებული საერთაშორისო ვითარება და ჩვენი ქვეყნის სტრატეგიულ მოკავშირეებთან ურთიერთობა მიმოიხილა ფრაქცია „ქართული ოცნების“ დეპუტატმა გიორგი ხელაშვილმა პარლამენტის საშემოდგომო სესიის პლენარულ სხდომაზე.
მისი თქმით, ამერიკელი კანონმდებლების შეხვედრები და განცხადებები კიდევ ერთხელ ადასტურებს ვაშინგტონის ურყევ მხარდაჭერას საქართველოს მიმართ.
„საქართველოს ტერიტორიების რუსეთის მიერ ოკუპაციასა და მცოცავ ანექსიას, თან დაერთო გართულებული ვითარება კავკასიაში. რუსეთის გავლენის კიდევ უფრო გაძლიერება ყარაბაღის კონფლიქტის გააქტიურების შემდეგ და ახლა უკვე რეგიონული, ფართო დესტაბილიზაციის საფრთხის ახალი კერის გაჩენა ავღანეთიდან, ჩვენი და ჩვენი მოკავშირეების შეიარაღებული ძალების გამოსვლის გამო. ამ ვითარებაში დიდ მნიშვნელობას იძენს საქართველოს კავშირები ჩვენს სტრატეგიულ მოკავშირეებთან. პირველ რიგში, ამერიკის შეერთებულ შტატებთან. მიმდინარე კვირას საქართველოში კონგრესის მაღალი დონის დელეგაციის ვიზიტი, რომლებიც კონგრესის რამდენიმე კომიტეტს წარმოადგენენ, ამ მხარდაჭერის კიდევ ერთი დადასტურებაა. საქართველო უფრო და უფრო მეტ წონას იძენს ამერიკის საგარეო პოლიტიკაში რეგიონში გაზრდილი საფრთხეების ფონზე და ამერიკელი კანონმდებლების შეხვედრები და განცხადებები კიდევ ერთხელ ადასტურებს ვაშინგტონის ურყევ მხარდაჭერას საქართველოს მიმართ“, – განაცხადა გიორგი ხელაშვილმა.