საქართველოს პარლამენტის თავმჯდომარესთან განვიხილეთ ყველა საკითხი, რომელიც ჩვენს საერთო ინტერესს წარმოადგენს. ძალიან მოხარულები ვართ საქართველოსთან თანამშრომლობით. ეს კავშირები ძალიან მნიშვნელოვანია, როგორც საქართველოსთვის, ასევე ეუთოს საპარლამენტო ასამბლეასთვის, – ამის შესახებ ეუთოს საპარლამენტო ასამბლეის პრეზიდენტმა, მარგარეტა ცედერფელტმა „ქრონიკას“ განუცხადა.
მისი თქმით, თანამშრომლობა გაგრძელდება.
„შეხვედრაზე ვისაუბრეთ საქართველოში დაგეგმილ არჩევნებზე და 2020 წლის არჩევნებზე მომზადებული რეკომენდაციების იმპლემენტაციაზე. სპიკერმა მოგვაწოდა ინფორმაცია რეკომენდაციების შესრულებასა და ასევე, ხალხის მიერ არჩეული პარლამენტის და არჩეული პოლიტიკური ძალების აქტიურად მუშაობაზე. განვიხილეთ ოკუპირებულ ტერიტორიებზე არსებული მდგომარეობა. ხაზი გავუსვით სტრასბურგის სასამართლოს გადაწყვეტილების მნიშვნელობას. მე ველოდები იმ დღეს, როდესაც ყველა საქართველოს საერთაშორისოდ აღიარებული საზღვრებს პატივს სცემს“, – განაცხადა ეუთოს საპარლამენტო ასამბლეის პრეზიდენტმა.
ქართული დელეგაცია ვენაში, პარლამენტის სპიკერების მეხუთე მსოფლიო კონფერენციაში მონაწილეობს.