ჩვენთვის დიდი მნიშვნელობა აქვს სომხეთის პოლიტიკურ სტაბილურობას. ეს პირდაპირ უკავშირდება ჩვენი ქვეყნისა და მთლიანად რეგიონის სტაბილურობას, – ამის შესახებ საქართველოს პრემიერ-მინისტრმა ირაკლი ღარიბაშვილმა დღეს სომხეთის პრემიერ-მინისტრ ნიკოლ ფაშინიათან გამართულ ერთობლივ პრესკონფერენციაზე განაცხადა.
„ჩვენს საერთო რეგიონალურ მიზანს სამ სიტყვაში ჩავტევდი: ესაა მშვიდობა, სტაბილურობა და კეთილდღეობა. რომელიც სამივე ქვეყანას გვაერთიანებს. საქართველო სამხრეთ კავკასიაში ყოველთვის იყო მშვიდობიანი თანაცხოვრების მომხრე, ჩვენ ეს ცოტა ხნის წინ საქმით დავამტკიცეთ. რამდენიმე თვის წინ მოგვეცა შესაძლებლობა, რომ ჩემი მედიაციით, ბატონი პრემიერის უშუალო მონდომებით, აზერბაიჯანის პრეზიდენტის ძალისხმევით, სამმა ქვეყანამ, ლიდერებმა მოვახერხეთ და მივაღწიეთ შეთანხმებას, რომელიც უკავშირდებოდა სომეხი ტყვეების დაბრუნებას სამშობლოში და ასევე აზერბაიჯანისთვის მნიშვნელოვანი დოკუმენტაციის, რუკების გადმოცემას. ეს წარმატებული პრეცედენტი ჩვენ გვაძლევს ოპტიმიზმის საფუძველს, რომ კიდევ მეტი შეგვიძლია გავაკეთოთ. სომხეთის პრემიერს დავუდასტურე, რომ საქართველოს განაგრძოს აქტიური მედიაციის როლი, იმიტომ რომ აღდგეს ნდობა, რომელიც მნიშვნელოვანია და არის საფუძველთა საფუძველი. ჩვენ მზად ვართ განვიხილოთ თანამშრომლობის ახალი იდეები და პროექტები“, – განაცხადა ღარიბაშვილმა.