ჩვენ ადგილობრივი თვითმმართველობის არჩევნები მოვიგეთ, რომელიც რეფერენდუმად გამოაცხადეს თავად („ნაცმოძრაობამ“) და ეს ე.წ. რეფერენდუმიც ჩენ მოვიგეთ, ავიღეთ 47 პროცენტი. ახლა ეს ყველაფერი ბოლომდეა მისაყვანი, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ გადაცემა „იმედი LIVE“-ში განაცხადა. მისი თქმით, „ნაცმოძრაობას“ მეორე ტურის მოგების მოლოდინიც არ აქვს.
„მათ მოლოდინიც არ აქვთ იმის, რომ შეუძლიათ მეორე ტური სადმე მოიგონ, რა თქმა უნდა არის რამდენიმე მუნიციპალიტეტი, სადაც მათი შედეგი იყო ახლოს 50%-იან მაჩვენებელთან, თუმცა იქაც, თუ დააკვირდებით, როგორ შეიძლება გადანაწილდეს ოპოზიციური ხმები საბოლოო ჯამში ნახავთ, რომ იქაც არ უნდა გაგვიჭირდეს მეორე ტურის მოგება. საბოლოო ჯამში საზოგადოება წყვეტს ყველაფერს, მაგრამ ყველანაირი რესურსი გვაქვს, იმის, რომ ჩვენ ოცივე მუნიციპალიტეტში მოვიგოთ მეორე ტური და ეს რატომ არის მნიშვნელოვანი – დემოკრატიაში ზოგადად, ერთი-ორი მუნიციპალიტეტის წაგება პრობლემა არ არის, პირიქით, შეიძლება კარგიც იყოს ქვეყნისთვის, რომ იყოს პლურალიზმი, მაგრამ „ნაცმოძრაობასთან“ ამის დაშვება არავითარ შემთხვევაში არ შეიძლება. რომ ავიღოთ ერთი მუნიციპალიტეტი, სადაც თეორიულად ვიღაცამ „ნაცმოძრაობიდან“ მოიგოს არჩევნები, მათი ერთადერთიო ამოცანა იქნება, რომ ეს კონკრეტული მუნიციპალიტეტი გადააქციონ მათ ბოლშევიკურ რევკომად იმისათვის, რომ მერე სხვა რაღაცებზე იფიქრონ. ამის საშუალება მათ ბუნებრივია არ უნდა მივცეთ. ამიტომ მნიშვნელოვანია, რომ ჩვენს ამომრჩეველს, 30 ოქტომბერს სრული მობილიზაცია ჰქონდეს იმისათვის, რომ არცერთი მუნიციპალიტეტი არ მოიგოს „ნაციონალურმა მოძრაობამ““, – განაცხადა ირაკლი კობახიძემ.