ფოლკლორის სახელმწიფო ცენტრის ხელმძღვანელის, გიორგი დონაძის ინფორმაციით, თავისუფლების მოედანზე „ქართული ოცნების“ შემაჯამებელ საარჩევნო შეკრებას ანსამბლი „ბასიანი“ საქართველოს ჰიმნით გახსნის. „27 ოქტომბერი ჩვენთვის ემოციური დღეა. აქცია საქართველოს ჰიმნით გაიხსნება. გვინდა, რომ ნამდვილი პატრიოტული გრძნობა გაღვივდეს. ქვეყანაში მთავარია სიმშვიდე, აღარ გვინდა არეულობა“, – განაცხადა გიორგი დონაძემ.
მისი თქმით, ის სამსახურიდან გამომდინარე ბევრს მოგზაურობს საქართველოს რეგიონებში – „სოფლებში ვხვდები ხალხს, ძალიან საყვარელ ადამიანებს, რომლებიც ტრადიციულ კულტურას ემსახურებიან, ისინი ინარჩუნებენ ჩვენს ჯანსაღ ტრადიციებს და არავის აღარ სურს არეულობა და პოლიტიკური პერიპეტიები. გვინდა სიმშვიდე, განვითარება და კულტურის განვითარებასა და ფოლკლორის შენარჩუნებას სჭირდება მშვიდი გარემო“, – აღნიშნა დონაძემ.
„ქართული ოცნების“ შემაჯამებელი საარჩევნო შეკრება – ღირსებისა და თავისუფლებისათვის დღეს თბილისში 17:00 საათზე გაიმართება.