სტრასბურგმაც დაგვიდასტურა, რომ სააკაშვილს ზნე არ უცვლია, ის არის ერთი თაღლითი და მავნებელი კაცი, რომელსაც საქართველო და მისი ინტერესები საერთოდ არ ადარდებს, – ამის შესახებ ოპოზიციონერმა დეპუტატმა, ალეკო ელისაშვილმა განაცხადა.
ელისაშვილის თქმით, „დადასტურდა კიდეც და სააკაშვილი ამ თავის აფერისტობაში დაიხლართა“.
„წელიწად-ნახევარი ის და მისი დამქაშები აწვალებდნენ საქართველოს ტყუილით, თითქოს სააკაშვილი კვდებოდა, დემენცია ჰქონდა, ვერ ლაპარაკობდა და ხელები უკანკალებდა. სააკაშვილი ჩვეულებრივი აფერისტი და სიმულიანტია. მთელი მედია ამას იყო აყოლილი და წელიწად-ნახევარი სხვა არაფერი არ იყო, რომ თურმე კოსმოსიდან ასხივებდნენ, ასე უშვრებოდნენ, ისე უშვრებოდნენ და აღმოჩნდა, რომ ჩვეულებრივი თაღლითია. ამ სიტუაციიდან ვინ მოიგო? ქართულმა ოცნებამ. იმიტომ, რომ მეტი სალაპარაკო არ იყო. წელიდად-ნახევარი იყო სააკაშვილი, სააკაშვილი. კარგი დიეტოლოგივით დამდევდნენ ჟურნისტები, რომ რა სჭირს. მე რა ვიცოდი, სააკაშვილს რა სჭირდა. მსაყვედურობდნენ, რატომ არ შედიხარ, რომ მომენახულებინა, რა დიაგნოზი უნდა დამესვა? ჩამოვიდა ჯგუფი სტრასბურგიდან, შეისწავლეს და ნახეს, რომ არაფერი არ სჭირს ამ კაცს და მშვენიერ პირობებშია. კიდევ ერთხელ დასტურია, რომ ნაციონალური მოძრაობა და მათი ლიდერი როგორი მავნებლები არიან ამ ქვეყნის მიმართ. ეს ქვეყანა როგორ ფეხებზე ჰკიდიათ. ოღონდ თვითონ დაბრუნდნენ ხელისუფლებაში და ოღონდ თავისუფლებაზე გამოვიდეს სააკაშვილი, ქვა-ქვაზე არ დარჩენილა საქართველოში. წელიწად-ნახევარი ვერაფერზე ვერ ვილაპარაკეთ იმის გარდა, ვაიმე, რა სჭირს სააკაშვილს, ჯანდაბა სჭირდა და დოზანა, ახია. ჩემთვის ყველაზე შეურაცხმყოფელი იყო, როდესაც სააკაშვილმა, ორგზის პრეზიდენტმა და ორგზის საქართველოს შეიარაღებული ძალების მთავარსარდალმა, როგორც კი საპრეზიდენტო ვადა ამოეწურა, ქართული პასპორტი გადახია, დაიხურა ქუდი და დაიწყო აფერისტობა უკრაინის ჰიმნზე, რომ მღეროდა და ცრემლები რომ მოსდიოდა. ასეთი რაღაც როგორ შეიძლება, ეს ჩემთვის, როგორც საქართველოს მოქალაქისთვის, იყო ერთ-ერთი ყველაზე დიდი შეურაცხყოფა. ახლა დადასტურდა კიდეც და სააკაშვილი ამ თავის აფერისტობაში დაიხლართა“, – განაცხადა ელისაშვილმა.
სტრასბურგის სასამართლომ მიხეილ სააკაშვილის სარჩელი 2017 წელს უკრაინის მოქალაქეობის ჩამორთმევასთან დაკავშირებით დაუშვებლად ცნო.