„ქართული ოცნების“ აღმასრულებელი მდივანი მამუკა მდინარაძე სალომე ზურაბიშვილის მიერ საქართველოს ეროვნული ბანკის საბჭოს წევრების შესარჩევ კომისიასთან დაკავშირებით ჟურნალისტებთან საუბრობს.
მდინარაძე აღნიშნავს, რომ სალომე ზურაბიშვილმა კომისია იმ ადამიანით დააკომპლექტა, რომელიც საბოტაჟში მონაწილეობდა.
მისივე განცხადებით, სალომე ზურაბიშვილი თავად გახდა „ნაცმოძრაობის“ ერთი რიგითი აქტივისტი, რომელიც იმ დონის ცუდ რაღაცებს კადრულობს, რომელსაც ყველაზე რადიკალი „ნაცები“ კადრულობენ.
„სალომე ზურაბიშვილმა [სებ-ის საბჭოს წევრების შესარჩევი კომისია] დააკომპლექტა იმ ადამიანებით, ყოველ შემთხვევაში ერთი ვიცი და ასეთი შეიძლება სხვაც იყოს, ერთ-ერთი, რომელმაც სამწუხაროდ, საბოტაჟში მიიღო მონაწილეობა. როდესაც ეგონათ, რომ საბანკო სისტემა ჩამოიშლებოდა, მათ ეს ქნეს, გააკეთეს და გადადგნენ. საბანკო სისტემა არ ჩამოიშალა და ადამიანი, რომელიც კომისიაში შეიყვანა, მან სალომე ზურაბიშვილის საბოტაჟის გეგმაში მიიღო უკვე მონაწილეობა და ამით ის მხილებულია. ეს სქემა მთლიანად მხილებულია და სალომე ზურაბიშვილი თავად გახდა „ნაცმოძრაობის“ ერთი რიგითი აქტივისტი, რომელიც ყველაფერს კადრულობს. იმ დონის ცუდ რაღაცებს კადრულობს, რომელსაც ყველაზე რადიკალი „ნაცები“ კადრულობენ“, – აცხადებს მამუკა მდინარაძე.
სალომე ზურაბიშვილის კომისია, რომელმაც ეროვნული ბანკის საბჭოს წევრები უნდა შეარჩიოს, „ქრონიკის“ ინფორმაციით, პირადი ინტერესებით მოქმედებს.